Sý únemdeý tehnologııalary qoldanylatyn jer kólemi 543,5 myń gektarǵa jetti
ASTANA. KAZINFORM - Sý resýrstary jáne ırrıgatsııa mınıstri Nurjan Nurjigitov Májilistiń jalpy otyrysyna qatysyp, vedomstvonyń Ornyqty damý maqsattarynyń ulttyq ındıkatorlaryna qol jetkizý baǵytynda atqarǵan jumystary týraly baıandady.
Atap aıtqanda, byltyr sý salasynyń negizgi kapıtalyna shamamen 400 mlrd teńge ınvestıtsııa tartyldy. Bul josparlanǵan kórsetkishten 22%-ǵa joǵary. Sońǵy eki jylda salaǵa tartylǵan ınvestıtsııa kólemi 676,7 mlrd teńgeni qurady.
Aıta ketý kerek, bul kórsetkish 2021-2023 jyldary tartylǵan ınvestıtsııa kóleminen edáýir joǵary. Osy kezeńde sý salasyna 569 mlrd teńge ınvestıtsııa tartylǵan bolatyn.
Sońǵy eki jylda shamamen 1500 shaqyrym kanal betondaldy. Sonymen qatar kanaldardy mehanıkalyq tazartý jumystary jandandy. Sońǵy eki jylda tazartylǵan kanaldardyń jalpy uzyndyǵy 3158 shaqyrymǵa jetti. Salystyrý úshin aıtsaq, 2023 jyly 678 shaqyrym kanal tazartylǵan.
Sýarmaly eginshilikte sý únemdeý tehnologııalaryn engizýdiń arqasynda byltyr 874 mln tekshe metr sý únemdeldi. Bul josparlanǵan 728 mln tekshe metr kórsetkishten 20%-ǵa artyq.
Qazaqstanda sý únemdeý tehnologııalaryn engizý qarqyny da aıtarlyqtaı ósti. 2024 jylǵa deıin mundaı júıeler jylyna orta eseppen 30 myń gektar jerge engizilip kelse, 2024 jáne 2025 jyldary bul kórsetkish jylyna 150 myń gektarǵa deıin jetti.
2025 jyldyń qorytyndysy boıynsha elimizde sý únemdeý tehnologııalary qoldanylatyn jer kólemi 543,5 myń gektardy qurady. 2030 jylǵa qaraı bul kórsetkishti 1,3 mln gektarǵa deıin nemese respýblıkadaǵy sýarmaly jerlerdiń jalpy kóleminiń 70%-yna jetkizý josparlanyp otyr.
Sondaı-aq ırrıgatsııalyq ınfraqurylymdy tsıfrlandyrý modeli tolyqtaı qaıta qaraldy. Sý esebin júrgizýmen qatar gıdrotoraptardyń qaqpalaryn avtomattandyrylǵan túrde basqarý jáne sýdy bólýdi qamtıtyn keshendi tsıfrlandyrý modeline kóshý týraly sheshim qabyldandy.
Mınıstrlik Qazaqstannyń ońtústigindegi ırrıgatsııa jáne drenaj júıelerin jetildirý jobasynyń ekinshi kezeńi aıasyndaǵy jumystardy jedeldetýge de qol jetkizdi. Qazirgi ýaqytta joba 93%-ǵa oryndalǵan. Qurylys-montaj jumystary jyl sońyna deıin tolyq aıaqtalady dep kútilip otyr.
- Kúrdeli klımattyq jaǵdaılar týyndatqan qıyndyqtarǵa qaramastan, mınıstrlik qabyldaǵan osy jáne ózge de sharalardyń nátıjesinde byltyr 1,2 mln gektar jerdi sýarýǵa 11,1 mlrd tekshe metr sý jetkizildi. Sonyń arqasynda 2025 jylǵy sýarý maýsymy ónim shyǵynynsyz aıaqtaldy. Barlyq sý sharýashylyǵy basseınderinde sý berý turaqty túrde jáne sharýalardyń qajettilikterine sáıkes júrgizildi, - dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin habarlaǵanymyzdaı, barlyq kásiporyn sý únemdeýdiń bes jyldyq josparyn ázirleýge mindetteledi.
