Elimizde sý tasqynyn boljaý men modeldeýdiń tsıfrlyq júıesi ázirlenip jatyr
ASTANA. KAZINFORM – QR Premer-Mınıstriniń orynbasary Qanat Bozymbaev sý tasqynyn boljaý men modeldeýdiń aqparattyq júıesin ázirleý boıynsha keńes ótkizdi. Bul týraly QR Premer-Mınıstriniń saıty jazdy.
Keńeske sý resýrstary jáne ırrıgatsııa, tsıfrlyq damý, ınnovatsııalar jáne aeroǵarysh ónerkásibi, tótenshe jaǵdaılar, ekologııa jáne tabıǵı resýrstar, qarjy vıtse-mınıstrleri qatysty.
Málim bolǵandaı, aqparattyq júıege tórt modýl kiredi: derekterdi jınaý, taldaý, boljaý jáne modeldeý. Ol «Qazaqstan Ǵarysh Sapary», «Qazgıdromet» jáne «Ulttyq geodezııa jáne keńistiktik aqparat ortalyǵynyń» jedel jáne kópjyldyq derekterin paıdalanatyn bolady.
Sondaı-aq júıe sý tasqyny, sel, kóshkin qaýpi bar ýchaskeler men gıdrotehnıkalyq qurylystar boıynsha TJM derekter bazasymen biriktiriledi.
«Tsıfrlyq damý, ınnovatsııalar jáne aeroǵarysh ónerkásibi mınıstrligi eýropalyq Jerdi qashyqtan zondtaý baǵdarlamasyn qoldanýdy usyndy. Sonymen qatar vıtse-premer otandyq tsıfrlyq sheshimderdi qarastyrýdy tapsyrdy. Buǵan qosa, aýqymdy derekter kózin qalyptastyrý úshin vıtse-premer gıdro jáne meteoposttardyń sanyn kóbeıtýdi, sý aıdyndary men ózenderdiń batımetrııasyn júrgizýdi, sondaı-aq sý tasqyny qubylystary jıi oryn alatyn eldi mekenderdiń „tsıfrlyq relefin“ qurýdy tapsyrdy», - delingen habarlamada.
