Elimizde sý salasyna maman daıarlaıtyn oqý oryndarynyń sany 1,5 ese ósti
ASTANA.KAZINFORM - Elimizde Sý resýrstary jáne ırrıgatsııa mınıstrligi qurylǵannan beri sý sharýashylyǵy salasynyń kadrlyq áleýetin arttyrý boıynsha jumys júrgizilip keledi. Atap aıtqanda, elimizdiń sý sharýashylyǵy salasyna mamandar daıarlaıtyn oqý oryndarynyń sany artyp otyr.
Máselen, 2023 jyly respýblıkada bolashaq sý sharýashylyǵy mamandaryn daıarlaıtyn 9 joǵary oqý orny jáne 6 kolledj bolsa, búginde sý sharýashylyǵy salasyna mamandardy 13 ýnıversıtet pen 10 arnaýly orta oqý orny daıarlaıdy.
Mınıstrlik málimetinshe, sý salasyna kadr daıarlaıtyn oqý oryndarynyń jalpy sany 15-ten 23-ke deıin ósti.
Atap aıtqanda, Memleket basshysynyń tapsyrmasyna sáıkes Taraz qalasynda Qazaq ulttyq sý sharýashylyǵy jáne ırrıgatsııa ýnıversıteti quryldy. Sonymen qatar Astana tehnologııalyq kolledji, Kóksý polıtehnıkalyq kolledji, Temirtaý joǵary polıtehnıkalyq kolledji jáne Mańǵystaý ındýstrııalyq-tehnıkalyq kolledji stýdentterine sý salasy boıynsha mamandyqtarda bilim alý múmkindigi berildi.
– Mınıstrlik sý sharýashylyǵy mamandaryn daıarlaıtyn barlyq oqý ornymen memorandýmdar jasasty. Bul oqý oryndarynda bilim alatyn stýdentter «Qazsýshar» RMK-nyń fılıaldarynda óndiristik tájirıbeden ótedi. Bıyl sý sharýashylyǵy salasynda óndiristik tájirıbeden ótken stýdentterdiń sany byltyrmen salystyrǵanda eki esege jýyq artty. Qazirgi tańda sý salasy boıynsha mamandyqtarda shamamen 2,7 myń adam bilim alyp jatyr, - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, sý únemdeý mádenıetin qalyptastyrýǵa arnalǵan jańa bilim berý resýrsy ázirlenip jatyr.
