Elimizde sý salasyna ǵana mamandanǵan JOO qurylýy múmkin

ASTANA. KAZINFORM –  Prezıdent keńesshisi Qanat Bozymbaev «Global Water» atty sý únemdeý tehnologııalaryna arnalǵan birinshi halyqaralyq forýmda Elimizde sý salasyna ǵana mamandanǵan JOO qurylýy múmkin ekenin málim etti.

«Jalpy sýdy kóp shyǵyndaıtyn daqyldardyń alqabyn azaıtyp, olardy sýdy barynsha az shyǵyndaıtyn daqyldarmen aýystyrý kerek. Sýmen jabdyqtaý salasynda sýdy qatalap paıdalaný, qaldyq sýdy óńdep tutyný tásilderin belsendi paıdalanýdan úlken áleýet kórip otyrmyz. Kez kelgen iri sý tutynýshy kásiporynda óziniń sý tutyný kólemin 25-30% azaıtýǵa baǵyttalǵan is sharalaryn jospary bolý kerek. Mundaı jumys ta osy kezden bastalý kerek», - dedi Qanat Bozymbaev.

Sondaı-aq, eldegi sýdyń kóbi býlaný arqyly da rásýa bolyp jatqanyn atap ótti.

«Bul máselede halyqaralyq tájrıbeni eskerý óte mańyzdy. Ókinishke qaraı, bizdegi sý salasyn ǵylymı zertteý jaǵy shetelmen salystyrǵanda birtalaı artta qalǵan. Qazir bizge bul salada sapaly mamandar buryn bolmaǵan deńgeıde qajet. Elimizdegi bazalyq joǵary oqý oryndarynyń birin taza sý taqyrybyna mamandanǵan ýnıversıtet etip qalpyna keltirý máselesi qaralyp jatyr», - dedi Prezıdent keńesshisi.