Elimizde sý resýrstaryn basqarý júıesi ózgeredi
ASTANA. KAZINFORM — Qazaqstanda sý qaýipsizdigin qamtamasyz etýdiń jańa júıesi qalyptasyp keledi. Sý resýrstaryn qorǵaý jáne tıimdi paıdalaný úshin elimizdiń segiz sý sharýashylyǵy basseıni boıynsha arnaıy josparlar ázirlenip jatyr.
Sý resýrstary jáne ırrıgatsııa mınıstrliginiń «Sý resýrstarynyń aqparattyq-taldaý ortalyǵy» KEAQ byltyr qabyldanǵan Sý kodeksine sáıkes basseındik josparlardy ázirleýdiń ekinshi kezeńine kiristi.
Josparlar ár basseınniń sý sharýashylyǵy balansyn, sý resýrstarynyń jaı-kúıi men paıdalanylýyn baǵalaýdy qamtıdy. Sondaı-aq sý sharýashylyǵy jáne gıdrotehnıkalyq nysandardy jańǵyrtý, balamaly sý kózderin paıdalaný, ózen-kólderdi qalpyna keltirý jáne sý paıdalanýdyń ekonomıkalyq tetikterin jetildirý boıynsha sharalar qarastyrylady.
Budan bólek, qujattarda qurǵaqshylyq pen sýdyń zııandy áserinen týyndaıtyn qaýipterdiń aldyn alý joldary da qamtylady.
Jospardy ázirleýdiń alǵashqy kezeńinde sý nysandary, jerústi jáne jerasty sýlary, sý sapasy, klımattyq jaǵdaı, sý paıdalaný kólemi, ınfraqurylymnyń jaı-kúıi jáne ekologııalyq ahýal týraly derekter jınalyp, taldanǵan. Sonymen birge óńirlerdiń áleýmettik-ekonomıkalyq kórsetkishteri zerttelgen.
Ekinshi kezeńde osy derekter men sý sharýashylyǵy balansynyń esepteri negizinde negizgi problemalar men qaýip-qaterler anyqtalyp, olardyń mańyzdylyǵy baǵalanady. Sonymen qatar aldaǵy kezeńdegi sýmen qamtamasyz etilý deńgeıine boljam jasalyp, sý tapshylyǵy men basqa da qaýipterdiń táýekeli saralanady.
Keıin basseındik josparlardyń maqsattary men mindetteri, nysanaly kórsetkishteri aıqyndalady. Sý sharýashylyǵy jáne sý qorǵaý sharalarynyń birneshe nusqasy ázirlenip, olardyń áleýmettik-ekonomıkalyq jáne ekologııalyq áseri baǵalanady. Sonyń negizinde naqty is-sharalar baǵdarlamasy jasalyp, ony iske asyrý kezeńderi belgilenedi.
Josparlaý kezinde ár sý sharýashylyǵy basseıniniń 15 jyldyq damý perspektıvasy eskeriledi.
Sý resýrstary jáne ırrıgatsııa birinshi vıtse-mınıstri Nurlan Aldamjarovtyń aıtýynsha, basseındik josparlar Qazaqstandaǵy sý resýrstaryn basqarýdyń jańartylǵan júıesiniń negizine aınalady.
— Basseındik josparlar elimizdiń segiz sý sharýashylyǵy basseıniniń árqaısysy boıynsha jeke ázirlenedi. Bul aýmaqtardyń erekshelikterin, sý resýrstarynyń kólemin, ınfraqurylymnyń jaı-kúıin, halyq pen ekonomıkanyń qajettilikterin jáne ekologııalyq ahýaldy eskerýge múmkindik beredi. Osy qujattardyń negizinde sý resýrstaryn keshendi basqarýdyń Bas jospary ázirlenip, sý qaýipsizdiginiń jalpyulttyq modeli qalyptasady. Bul qujat memlekettik josparlaýdyń mańyzdy elementine aınalady, — dedi ol.
Eske salaıyq, munyń aldynda elimizde sý únemdeý maqsatynda qandaı jumystar atqarylyp jatqany týraly jazǵanbyz.
