Elimizde stýdentterge qansha jataqhana orny jetispeıdi
ASTANA. KAZINFORM — Jataqhana tapshylyǵy máselesinde QR Ǵylym jáne joǵary bilim mınıstrligi men JOO-lar usynǵan derekter sáıkes kelmeıdi. Bul jóninde QR Joǵary aýdıtorlyq palatasynyń múshesi Tilegen Kaskın málimdedi.
— 2024–2025 oqý jylynda jataqhanalarda 10 myńnan astam oryn tapshy boldy. Bul rette mınıstrlik pen operator derekteri arasyndaǵy qajettilikke qatysty alshaqtyq 31 myń orynnan asyp tústi, — dedi ol.
Sondaı-aq, stýdentterdi jataqhanaǵa ornalastyrýdyń bekitilgen normasy oryndalmaı otyr.
— Baspanamen qamtamasyz etý deńgeıi buryn belgilengen 70% baǵdardan edáýir tómen: Eýrazııa ýnıversıtetinde — 51,7%, Qazaq ulttyq ýnıversıtetinde — 56,7%. Sonymen qatar, Qazaq ulttyq ýnıversıteti men Eýrazııa ýnıversıtetinde ákimshilik qajettilikterge avtokólik satyp alýǵa 133 mln teńgeden astam qarajat jumsalǵan, — Joǵary aýdıtorlyq palata múshesi.
Aıta keteıik, buǵan deıin elimizde jetkilikti maman daıarlanbaı otyrǵan asa mańyzdy segiz sala anyqtalǵanyn jazǵanbyz.
