Elimizde stýdentter sany qansha ekeni belgili boldy
ASTANA. KAZINFORM — Qazir Qazaqstanda 122 joǵary oqý orny jumys isteıdi. Sondaı-aq stýdentter sany 700 myńnan asady.
Bul týraly Úkimet otyrysynda QR Ǵylym jáne joǵary bilim mınıstri Saıasat Nurbek málim etti. Mınıstrdiń dereginshe, joǵary oqý oryndarynyń qurylymy mynadaı: 12 ulttyq ýnıversıtet, 30 memlekettik, 1 halyqaralyq, 11 aktsıonerlik, 1 derbes bilim berý uıymy, 15 azamattyq emes jáne 52 jekemenshik oqý orny bar.
Sondaı-aq stýdentter kontıngenti 724 myńnan asady. Onyń ishinde 658 myńy bakalavrıatta bilim alsa, shamamen 40 myńy magıstratýrada, 9 myńǵa jýyǵy doktorantýrada oqıdy. Budan bólek, 16 myńnan astam stýdent ınternatýra men rezıdentýrada bilim alady. Sheteldik stýdentter sany 35 myńnan asady.
Spıkerdiń aıtýynsha, joǵary bilim berý júıesin ınternatsıonaldandyrý jumystary jalǵasyp jatyr. Qazirgi tańda elimizde 32 sheteldik ýnıversıtet jumys isteıdi. Olardyń qatarynda fılıaldar, strategııalyq áriptestikter jáne Lý Ban sheberhanalary bar.
— Bul — AQSh, Ulybrıtanııa, Qytaı, Ońtústik Koreıa, Frantsııa, Germanııa jáne basqa elderdiń ýnıversıtetteri. Atalǵan jobalardaǵy stýdentter kontıngenti shamamen 12 myń adamdy quraıdy. Onyń ishinde 700-ge jýyq sheteldik stýdent bar, — dedi mınıstr.
Sonymen qatar ol joǵary oqý oryndarynda jazǵy emtıhan sessııasy aıaqtalýǵa jaqyn ekenin atap ótti.
— Bıyl shamamen 193 myń maman ýnıversıtetti bitiredi. Bul — sońǵy jyldardaǵy eń iri túlekter shyǵarylymdarynyń biri. Túlekterdiń qorytyndy attestattaýy 20 maýsymǵa deıin ótedi, al dıplom tapsyrý rásimin 10 shildege deıin aıaqtaý josparlanǵan, — dep tolyqtyrdy.
Buǵan deıin Qazaqstan qandas stýdentterge qandaı jeńildik usynatynyn jazǵanbyz.
