Elimizde stıhııalyq qoqys oryndaryn spýtnıktiń kómegimen anyqtap jatyr

ASTANA. KAZINFORM – Úıilgen qoqys oryndary spýtnıkten túsirilgen sýretter arqyly anyqtaldy. Bul týraly Ekologııa jáne tabıǵı resýrstar vıtse-mınıstri Jomart Álıev málim etti.

«Biz birneshe jyldan beri «Qazaqstan ǵarysh sapary» ulttyq kompanııasymen jumys istep kelemiz. Kompanııa spýtnıkten 50 shaqyrym radıýsta eldi mekenderdiń sýretin túsiredi, sonyń kómegimen biz stıhııaly qoqystardyń úıilgen jeri men onyń kólemin kóre alamyz. Ekologııalyq ınspektorlar jedel baryp, stıhııalyq qoqys tastaıtyn jerlerdi joıýmen aınalysady», - dedi Jomart Álıev Qazaqstanda qaıtalama shıkizatty qaıta óńdeý jónindegi konferentsııada. 

Mınıstr orynbasarynyń aıtýynsha, byltyr jyl sońyna qaraı mamandar stıhııalyq qoqys úıindileriniń 80% joıǵan. 

«Stıhııalyq qoqys polıgondaryn tolyqtaı joıý nemese toqtatý múmkin emes. Mysaly, azamattar úıin jóndegen soń, qurylys qoqystaryn qala syrtyna shyǵaryp tastaı salady. Belgilenbegen jerlerge qoqys shyǵarǵany úshin aıyppuldy únemi kóterýdi kózdep otyrmyz, sebebi jaýapkershilikti qatańdatý sanktsııalary óz jemisin beredi», - deıdi ol. 

Aıta ketsek, elimizde turmystyq qaldyqtardyń 24% ǵana suryptalyp, qaıta óńdeledi. 

Sondaı-aq, Qazaqstandaǵy 100 myń tonna plastıktiń tek 3,5 myń tonnasy qaıta óńdeletin bolyp shyqty.