Elimizde stalkıng úshin qylmystyq jaýapkershilik engiziledi

ASTANA. KAZINFORM – Elimizde stalkıng úshin qylmystyq jaýapkershilik engiziledi. Bul týraly Ádilet mınıstrligi qoǵamdyq tártip salasyndaǵy zańnama departamentiniń dırektory Dýman Súleımenov málim etti.

- Stalkıng – adamnyń zańsyz qýdalanýy, ol qoǵamǵa eleýli qaýip tóndiredi. Bul áreket jábirlenýshige psıhologııalyq turǵydan keri áser etedi, ıaǵnı úreı, qorqynysh, alańdaýshylyq týdyrady. Stalkıng kezinde kóbine qorqytý, ar-namysqa tııý, qorlaý sııaqty áreketter baıqalady. Sondyqtan bul áreketter úshin Qylmystyq kodekste bólek bappen jaýapqa tartý talap etilip otyr,- dedi Dýman Súleımenov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, Qylmystyq kodekske stalkıngke qarsy arnaıy bap bolmaǵandyqtan, onyń qurbandary kóbeıýi múmkin.

- Stalkıngke ushyraýdyń arty fızıkalyq zorlyq-zombylyqqa, qorlyq kórsetýge, múlikke zaqym keltirý qaýpine ákelýi múmkin. Sondyqtan otbasylyq turǵyda da stalkıngke jaýapkershilik engizý jábirlenýshilerdi qorǵaýǵa múmkindik beredi,- deıdi Ádilet mınıstrliginiń ókili.

Aıta keteıik, bıyl 26 maýsymda Senat «Qazaqstannyń qylmystyq zańnamasyn ońtaılandyrý máseleleri boıynsha ózgerister men tolyqtyrýlar engizý týraly» zańdy maquldady.

Osy oraıda Qylmystyq kodekske stalkıng, ıaǵnı adamdy onyń erkine qaıshy keletin, zorlyq-zombylyqpen ushtaspaıtyn, eleýli zııan keltirýge ákep soqqan baılanys ornatýǵa jáne onyń izine túsýge baǵyttalǵan is-áreketterde kórinis tabatyn, adamdy zańsyz qýdalaǵany úshin qylmystyq jaýaptylyqty kózdeıtin jańa 115-1-bap engizildi.