Elimizde stalkıng úshin qylmystyq jaýapkershilik engizildi
ASTANA. KAZINFORM — Azamattardyń jeke bas bostandyǵyn qorǵaý jónindegi sharalardy kúsheıtý maqsatynda jáne «Zań men Tártip» tujyrymdamasyn iske asyrý sheńberinde 2025 jylǵy 16 shildede Memleket basshysy Qylmystyq kodekske 115-1 — «Stalkıng» jańa baby engizilgen Zańǵa qol qoıdy. Bul týraly Bas prokýratýra málim etti.
Stalkıng — bul adammen qarym-qatynas ornatýǵa jáne (nemese) onyń erkine qaıshy keletin, zorlyq-zombylyqpen ushtaspaǵan, eleýli zııan keltirgen áreketterdi bildiretin adamdy zańsyz qýdalaý. Otandyq zańnamada mundaı áreketter úshin 200 AEK-ke deıin aıyppul, 200 saǵatqa deıin qoǵamdyq jumystar nemese 50 táýlikke deıin qamaýǵa alý túrindegi qylmystyq jaýapkershilik alǵash ret kózdelgen.
— Eger stalkıng zorlyq-zombylyq, qorqytý, bopsalaý, jeke ómirge qol suǵylmaýshylyqty buzýmen qatar júrse, is-áreketter QK-niń basqa baptary boıynsha qosymsha saralanatyn bolady. Stalkıng baby boıynsha qylmystyq qýdalaý naqty zııan bolǵan kezde bastalatynyn bilý mańyzdy — mysaly, jeke ómirine qol suǵylmaý, erkin júrip turý quqyqtarynań shekteýleri nemese psıhologııalyq qysym kórsetý, — delingen habarlamada.
Jaýaptylyqty engizýdiń maqsaty – qurbandardy erte kezeńde qorǵaý jáne zorlyq-zombylyq pen agressıvti minez-qulyqqa móldem tózbeýshilik qalyptastyrý. Óz quzyreti sheginde júzege asyrylatyn quqyq qorǵaý organdarynyń zańdy áreketteri stalkıng belgilerine jatpaıtynyn atap ótken jón.
Bas prokýratýra azamattardy stalkıngtiń kórinisterine nemquraıly qaramaýǵa shaqyrady. Mundaı jaǵdaı týyndaǵan kezde dereý ishki ister organdaryna habarlasý qajet.
Eske sala keteıik, buǵan deıin kisi qolynan qaza tapqan áıelderdiń 76%-y stalkıng qurbany ekenin jazǵan edik.