Elimizde sport jabdyqtaryna qoıylatyn biryńǵaı talaptar belgilendi
ASTANA. KAZINFORM — Qazaqstanda sport jáne gımnastıka jabdyqtarynyń qaýipsizdigine qoıylatyn biryńǵaı talaptar bekitildi.
Tıisti tehnıkalyq reglamentter dene shynyqtyrý jáne sportpen aınalysýǵa qaýipsiz jaǵdaı jasaýǵa, sondaı-aq sport ınfraqurylymynyń sapasyn arttyrýǵa baǵyttalǵan. Qujattardy Týrızm jáne sport mınıstrligi bekitti.
Jańa talaptar sport jabdyqtaryn jobalaý men óndirýden bastap, montajdaý, paıdalaný, saqtaý, tasymaldaý jáne kádege jaratýǵa deıingi barlyq kezeńdi qamtıdy. Bul sport nysandaryndaǵy jabdyqtardyń sapasy men qaýipsizdigin baqylaýǵa múmkindik beredi.
Talaptar fýtbol, shaǵyn fýtbol, gandbol jáne shaıbaly hokkeı qaqpalaryna, sondaı-aq batýt, qossyryq, bórene, kerme, tósenish, shyǵyrshyq, arqan, shved qabyrǵasy jáne basqa da sport jabdyqtaryna qoldanylady.
— Qaýipsizdik — buqaralyq jáne kásibı sportty damytýdyń negizgi quramdas bóligi. Ásirese balalar men jasóspirimder turaqty túrde jattyǵatyn sport mektepteri, sektsııalar men dene shynyqtyrý nysandarynda qaýipsizdikti qamtamasyz etý asa mańyzdy. Búginde biz sport ınfraqurylymyn keńeıtip, qaýipsizdikke qoıylatyn talaptardy da kúsheıtip jatyrmyz. Jańa tehnıkalyq reglamentter sport jabdyqtarynyń sapasyna, olardy ornatý jáne paıdalaný tártibine biryńǵaı talaptar qalyptastyrady. Bul — Qazaqstandaǵy sport ınfraqurylymyn zamanaýı talaptarǵa sáıkestendirip, sportshylar men dene shynyqtyrýmen aınalysatyn barlyq azamattar úshin qolaıly ári qaýipsiz jaǵdaı jasaý baǵytyndaǵy mańyzdy qadam, — dedi Dene shynyqtyrý jáne sport isteri komıteti tóraǵasynyń orynbasary Rýslan Sergazın.
Jańa talaptar sport jabdyqtarynyń sapasy men qaýipsizdigin arttyryp, olardy jobalaý, óndirý, ornatý jáne paıdalaný kezinde biryńǵaı tásil qalyptastyrýǵa múmkindik beredi.
Tehnıkalyq reglamentter Saýda jáne ıntegratsııa mınıstrligi, Ulttyq ekonomıka mınıstrligi, sondaı-aq basqa da múddeli memlekettik organdar men qoǵamdyq uıymdarmen kelisildi.
Aıta ketelik Azıadanyń fınalynda tórt qazaqstandyq sportshy baq synaıtyny týraly jazǵan edik.
