Elimizde sport mamandaryn daıarlaý isi jańa deńgeıge kóteriledi
ASTANA. KAZINFORM — Búgin Astanada Qazaqstan Respýblıkasynyń Ulttyq Olımpıadalyq komıteti men Qazaq ulttyq sport ýnıversıteti (QUSÝ) yntymaqtastyq týraly memorandýmǵa qol qoıdy.
UOK baspasóz qyzmetiniń málimetine sáıkes, qujatqa qol qoıý rásimi ýnıversıtettiń resmı ashylýy aıasynda ótti. Memorandýmǵa Qazaqstan UOK-niń bas hatshysy Álimjan Aqaev pen QUSÝ rektory Tursynzada Qýanǵalıeva qol qoıdy.
Memorandým dene shynyqtyrý jáne sport salasyndaǵy uzaq merzimdi áriptestikti damytýǵa, birlesken bilim berý jáne ǵylymı bastamalardy júzege asyrýǵa, sondaı-aq, olımpıadalyq qundylyqtardy dáripteýge baǵyttalǵan.
Taraptar dene shynyqtyrý jáne sport salasyndaǵy memlekettik mindetterdi júzege asyrý aıasynda ózara yntymaqtastyqty damytýǵa, joǵary jetistikter sporty men buqaralyq sporttyń órkendeýine qoldaý kórsetýge, sondaı-aq, sport salasyna bilikti mamandar daıarlaý júıesin nyǵaıtýǵa nıetti.
Yntymaqtastyq aıasynda sport ǵylymy, sport menedjmenti jáne bilim berý baǵdarlamalaryn damytýǵa erekshe nazar aýdarylady. Kelisimge sáıkes, ýnıversıtet kampýsynda jattyqtyrýshylarǵa, sportshylarǵa, sala mamandaryna jáne sport uıymdarynyń basshylaryna arnalǵan birlesken ǵylymı-tájirıbelik konferentsııalar, sımpozıýmdar, semınarlar men sheberlik sabaqtary uıymdastyrylady.
Qazaqstan UOK-niń bas hatshysy Álimjan Aqaev ýnıversıtet ujymyn jańa oqý ornynyń ashylýymen quttyqtap, onyń elimizdiń sport salasyn damytýdaǵy mańyzyn atap ótti.
— Búgin biz elimizdegi sport salasy úshin tarıhı mańyzy bar oqıǵanyń kýási bolyp otyrmyz. Jańa ýnıversıtet otandyq sportty damytýǵa jáne Qazaqstannyń halyqaralyq arenadaǵy bedelin arttyrýǵa úles qosatyn joǵary bilikti jattyqtyrýshylar men sport menedjerlerin daıarlaıtyn zamanaýı bilim ordasyna aınalady. Sporttaǵy tabys sapaly bilimge, ǵylymı negizdelgen tásilderge jáne zamanaýı tehnologııalardy tıimdi qoldanýǵa tikeleı baılanysty. Qazaq ulttyq sport ýnıversıteti sport ǵylymyn damytýǵa, olımpıadalyq qozǵalysty nyǵaıtýǵa jáne jańa býyn jeńimpazdaryn tárbıeleýge eleýli úles qosady dep senemin, — dedi Álimjan Aqaev.
Osyǵan deıin Qazaqstan UOK Eco Athlete jobasy aıasynda úshinshi ekologııalyq aktsııasyn ótkizgenin jazǵanbyz.
