Densaýlyq saqtaý júıesine sozylmaly aýrýlardy erte anyqtaıtyn jasandy ıntellekt engiziledi
ASTANA. KAZINFORM – Qazaqstan Respýblıkasy Densaýlyq saqtaý mınıstrligi men halyqaralyq medıtsınalyq tehnologııalar kompanııasynyń ókilderi Qazaqstandaǵy Tsıfrlandyrý jáne jasandy ıntellekt jyly sheńberinde yntymaqtastyq nıetterin bekitetin ózara túsinistik týraly memorandýmǵa qol qoıdy.
QR Densaýlyq saqtaý mınıstrligi baspasóz qyzmetiniń habarlaýynsha, Carna Health kompanııasy sozylmaly aýrýlardyń aldyn alý jáne olardy erte kezeńde anyqtaýǵa arnalǵan jasandy ıntellekt tehnologııalaryn qoldanatyn platformalyq sheshimniń ázirleýshisi bolyp tabylady.
Carna Health platformasy CKM (Cardiovascular–Kidney–Metabolic) tujyrymdamasyna negizdelgen jáne patsıentterdiń jaı-kúıin úzdiksiz monıtorıngileýdi, qaýipterdi stratıfıkatsııalaýdy, sondaı-aq jalpy praktıka dárigerlerine arnalǵan derbestendirilgen klınıkalyq usynymdardy qamtamasyz etedi.
Kompanııa usynǵan derekterge sáıkes platforma dárigerlerdiń júktemesin 30%-ǵa deıin tómendetýge, sozylmaly búırek aýrýlaryn emdeýge jumsalatyn shyǵyndardy azaıtýǵa, sondaı-aq dıalız terapııasynyń kómirtek izin qysqartýǵa yqpal etedi.
Qazirgi ýaqytta kompanııanyń sheshimderi álemniń 35-ten astam elinde 70 myńnan astam adamdy qamtyp otyr jáne densaýlyq saqtaý salasyndaǵy jetekshi uıymdarmen áriptestik kelisimderi bar.
- Qol qoıylǵan memorandým platformany birneshe medıtsınalyq-sanıtarııalyq alǵashqy kómek uıymynda pılottyq aprobatsııadan ótkizýdi, sozylmaly aýrýlary bar naýqastardy esepke alý men qadaǵalap-qaraý úderisterin tsıfrlandyrýdy, sondaı-aq aýyldyq jerlerdegi medıtsına qyzmetkerleriniń tsıfrlyq quzyretterin arttyrýdy qosa alǵanda birlesken jumystyń yqtımal baǵyttaryn aıqyndaıdy,-delingen habarlamada.
Osyǵan deıin Qazaqstanda densaýlyq saqtaý júıesin tsıfrlandyrý kúsheıtiletini týraly jazdyq.
