Elimizde sottylyqtyń bar-joǵy týraly anyqtama alý tártibi ózgeredi
ASTANA. KAZINFORM — Qazaqstanda sottylyqtyń bar nemese joq ekendigi týraly anyqtama alý tártibine ózgerister engiziledi.
Jańa erejelerge sáıkes, anyqtamany alý jáne oǵan apostıl qoıý qyzmetterin bir ýaqytta rásimdeýge múmkindik beriledi. Sonymen qatar, qujattardy tapsyrý, qatelerdi túzetý jáne memlekettik qyzmet nátıjesin alý tártibi naqtylandy.
Tıisti ózgerister Bas prokýrordyń 2026 jylǵy 2 qarashadaǵy buıryǵymen engizildi.
Ózgeristerge saı, «Azamattarǵa arnalǵan úkimet» memlekettik korporatsııasy arqyly ótinish bergen kezde ótinish berýshiniń jeke kýáligi týraly málimetter «elektrondyq úkimet» shlıýzi arqyly memlekettik tsıfrlyq júıelerden alynady. Eger júıelerde qajetti málimetter bolmasa, qyzmetker qujattardyń tsıfrlyq kóshirmelerin jasap, túpnusqalaryn ótinish berýshige qaıtarady.
Memlekettik korporatsııa qabyldanǵan qujattardy sol kúni qyzmet kórsetýshi organǵa jiberýge mindetti. Bul rette, ótinish berýshige qujattardyń qabyldanǵany týraly qolhat beriledi. Qujattardy tapsyrǵan kún memlekettik qyzmet kórsetý merzimine kirmeıdi.
Qujattardan qate anyqtalǵan jaǵdaıda ne ózgeredi
Eger ótinishte nemese oǵan qosa berilgen qujattarda qateler, dálsizdikter, belgilengen talaptarǵa sáıkessizdikter anyqtalsa nemese qajetti qujattar tolyq bolmasa, ótinish tsıfrlyq kútý paraǵy arqyly qabyldanady.
Ótinish berýshige anyqtalǵan kemshilikterdi túzetip, qujattardy qaıta tapsyrý úshin bes jumys kúni beriledi. Bul kezeń memlekettik qyzmet kórsetýdiń jalpy merzimine qosylmaıdy.
Eger ótinish berýshi belgilengen merzimde barlyq eskertýlerdi túzetse, ótinish qabyldanǵan kún retinde bastapqy júgingen kúni esepteledi. Qyzmet kórsetý merziminiń esebi anyqtalǵan kemshilikter joıylǵannan keıin qaıta jalǵasady.
Eger ótinish berýshi bes jumys kúni ishinde qatelerdi túzetpese, ótinish pen qujattardy qabyldaýdan bas tartylady. Mundaı jaǵdaıda Memlekettik korporatsııa qyzmetkeri bas tartý týraly tıisti qolhat beredi.
Qujattar Memlekettik korporatsııa arqyly tapsyrylǵan kezde onyń qyzmetkeriniń ETsQ-symen kýálandyrylǵan elektrondyq ótinish ótinish berilgen kúni «elektrondyq úkimet» shlıýzi arqyly «Taldaý ortalyǵy» tsıfrlyq júıesine jiberiledi.
Qyzmetti portal arqyly rásimdegen jaǵdaıda ótinish berýshi jeke kabıneti arqyly ótinishtiń qaralý mártebesin baqylaı alady. Sondaı-aq daıyn anyqtamany alý kúni men ýaqyty kórsetilgen habarlama da jeke kabınetke jiberiledi.
Budan bólek, anyqtamadaǵy jeke derekter, atap aıtqanda tegi, aty, ákesiniń aty, týǵan kúni men jeri «Jeke tulǵalar» memlekettik derekqoryndaǵy málimetterge sáıkes kórsetiledi.
Sottylyq týraly anyqtamany apostılmen birge alýǵa bolady
Taǵy bir mańyzdy ózgeris – sottylyǵynyń bar nemese joq ekendigi týraly anyqtamany apostılmen birge rásimdeý múmkindigi.
Ótinish berýshiniń qalaýy boıynsha, eki memlekettik qyzmetti bir rásim aıasynda alýǵa bolady. Ol úshin apostıl qoıylǵan anyqtamany alý týraly ótinish elektrondyq úkimet portaly nemese Memlekettik korporatsııa arqyly beriledi.
Qujatqa apostıl qoıý úshin memlekettik baj tólenedi. Ony «elektrondyq úkimet» shlıýzi nemese ekinshi deńgeıli bankter arqyly tóleýge bolady.
Qyzmetti portal arqyly rásimdegen kezde ótinish berýshi qujat usynylatyn shet memleketti, sondaı-aq qaǵaz túrindegi daıyn anyqtamany alǵysy keletin Memlekettik korporatsııa fılıalyn tańdaýy qajet.
Eki memlekettik qyzmetti kórsetýdiń jalpy merzimi 10 jumys kúni:
· 5 jumys kúni – sottylyǵynyń bar nemese joq ekendigi týraly anyqtamany daıyndaýǵa;
· 5 jumys kúni – anyqtamaǵa apostıl qoıýǵa arnalady.
Qyzmet nátıjesinde ótinish berýshige apostıl mórtabany qoıylǵan qaǵaz túrindegi anyqtama nemese memlekettik qyzmet kórsetýden bas tartý týraly jaýap beriledi.
Memlekettik korporatsııa arqyly ótinish bergen kezde apostıl qoıylǵan anyqtamany alý týraly ótinishpen birge apostıl úshin memlekettik bajdyń tólengenin rastaıtyn túbirtek te usynylýy qajet.
Ózgerister taǵy qandaı memlekettik qyzmetterge qatysty
Osyndaı túzetýler memlekettik qyzmet kórsetýdi retteıtin taǵy úsh qujatqa engizildi. Olar:
· prokýratýra, tergeý jáne anyqtaý organdarynyń resmı qujattaryna apostıl qoıý;
· Bas prokýratýranyń Quqyqtyq statıstıka jáne arnaıy esepke alý jónindegi komıtetiniń jáne onyń aýmaqtyq organdarynyń arhıvterinen arhıvtik anyqtamalar men qujattardyń kóshirmelerin berý;
· adamnyń sybaılas jemqorlyq qylmysyn jasaǵany týraly málimetter berý.
Jańa erejeler 2026 jylǵy 17 qarashadan bastap kúshine enedi.
Aıta keteıik, buǵan deıin áskerge jaramdylyq týraly anyqtamany eGov-tan alýǵa bolatynyn jazǵanbyz.
