Elimizde soǵym baǵasy qansha
ASTANA. KAZINFORM — Qazaqstandyqtar soǵym qamyna kiristi. Jylqy, sıyr jáne ógiz etin jiliktep, aıaqtap jáne bútindeı satyp alýǵa bolady. Qazir elimizdiń óńirlerinde et, soǵym baǵasynda aıtarlyqtaı aıyrmashylyq bar. Soǵym baǵasy maldy qaıda baqqanyna, jasyna jáne qalaı satyp alatynyna qaraı ózgeredi. Keıbir qalada baǵa júzdegen myń teńge bolsa, keıbir óńirde mıllıon teńgege deıin jetti. Kelilep satyp alsa, baǵa múlde basqa bolady. Kazinform tilshisi 20 qaladaǵy soǵym baǵasyn bilip, salystyrdy.
Soǵym baǵasy qaıda joǵary, qaı qalada tómen
Qazaqstan qalalaryndaǵy bazar baǵasyn salystyra kele, soǵym baǵasy mıllıon teńgege deıin jetkenin bildik. Almaty, Shymkent, Pavlodar, Kókshetaý men Óskemende osyndaı baǵa kezikti. Astana qalasynda baǵa 230 000 teńgeden bastalyp, 800 000 teńgege deıin jetti. Taldyqorǵanda 400 000 — 850 000 teńge aralyǵynda.
Qaraǵandy men Jezqazǵan qalalarynda soǵym baǵasy 350 000 teńgeden bastalyp, 750 000 teńgege deıin barady. Al Qostanaıda baǵa 500 000 — 850 000 teńge aralyǵynda. Taraz qalasynda 500 000 teńgeden bastalyp, 850 000 teńgege jetti. Túrkistan qalasynda soǵym baǵsy 500 000 — 700 000 teńge aralyǵynda.
Atyraý qalasynda soǵymǵa jylqy soısa, 500 000 — 600 000 teńge bolady. Semeı qalasynda soǵymǵa jas mal soısa, 270 000 — 300 000 teńgege esepteledi. Al eki jasar qashar baǵasy — 350 000 — 400 000 teńge. Jabaǵy 370 000 teńge bolsa, baıtal men bıe baǵasy 500 000 teńgeden bastalady.
Oral qalasynda jabaǵynyń baǵasy 225 000 teńge, al bıe baǵasy 450 000 teńge jáne odan joǵary. Aqtóbe qalasynda jabaǵy baǵasy 250 000 — 300 000 teńge, bıe 500 000 — 600 000 teńge. Sıyr baǵasy 500 000 — 800 000 teńge, ógiz quny 600 000 — 700 000 teńge aralyǵynda.
Shymkent qalasynda bıe baǵasy 500 000 teńgeden bastalyp mıllıonǵa jetedi. Sıyr baǵasy da 420 000 teńge jáne mıllıonǵa deıin kóteriledi. Ógizdi 600 000 — 700 000 teńgege satyp alýǵa bolady. Aqtaý qalasynda sıyr baǵasy 350 000 teńgeden bastalsa, jylqyny 750 000 teńgege baǵalaıdy.
Qonaev qalasyndaǵy habarlandyrýlarǵa súıensek, soǵymdy 550 000 — 800 000 teńgege satyp alýǵa bolady. Qyzylordada múıizdi iri qara baǵasy 350 000 –850 000 teńge aralyǵynda.
Sıyr men jylqy baǵasy jasyna qaraı ózgerip otyrady. Jas mal baǵasy ádette tómen bolady. Jabaǵy baǵasy arzan. Keıde ony jiliktep, aıaqtap satyp alýǵa múmkindik bar. Adamdar saýdasalyp ta tıimdi usynysty tabady. Demek qalalar arasyndaǵy reıtıng naqty emes.
Jylqy men sıyr etiniń baǵasy qansha
Soǵymdy bútindeı de, eki bólip te satyp alýǵa bolady. Adamdar qaltasyna qaraı aıaqtap, jitiktep te alady. Mundaıda baǵa ettiń kelisine tikeleı baılanysty.
Túrkistan qalasynda jylqy etiniń kelisi 2 800 — 3000 teńge, sıyr eti 3 000 — 3 200 teńge, al ógiz eti — 4 000–4 200 teńge aralyǵynda. Jylqy etiniń bir jiligi shamamen 23-27 keli bolsa, baǵasy 70-75 myń teńgege shyǵady. Al sıyr eti 75-80 myń teńge bolady.
Aqtaý qalasynda jylqy etiniń kelisi 2 700 — 3 200 teńge, sıyr etiniń kelisi 3 800 — 4 000 teńge. Atyraý qalasynda jabaǵy etiniń kelisi 2 900 — 3 200 teńge bolsa, sıyr etiniń baǵasy shamamen 4 000 teńge.
Petropavl qalasynda sıyr etiniń kelisi — 3 800 — 4000 teńge. Oral qalasynda sıyr etiniń kelisi shamamen 3 000 teńge bolyp tur. Taraz qalasynda jylqy etiniń baǵasy 3 100 teńge, sıyr eti 3 700 — 3 800 teńge.
Semeı qalasynda jabaǵy etiniń kelisin 3 200 teńgege eseptep beredi. Salmaǵy 125-155 teńge bolatyn baspaq etiniń kelisi 3 400 teńge.
Astana qalasynda sıyr etiniń kelisi 3 950 teńgeden bastalady. Jabaǵy etiniń kelisi 3 450 teńge bolsa, bıe etiniń qazysy maıly bolsa kelisi 4 000 teńgeden bastalady.
Tirideı alǵan tıimdi me álde kelilep alsa uta ma?
Soǵym tańdaǵan kezde onyń qosymsha shyǵynyn da eseptegen durys. Eger tirideı satyp alsa, ony soıý jáne ishek-qarnyn tazartý kerek. Jetkizý de qosymsha qarjyny talap etedi. Mal tańdaı biletin adam soǵymdy tirideı alsa qansha et shyǵatynyn, semiz nemese aryq ekenin birden biledi.
Eger aıaqtap nemese jiliktep satyp alsa, ettiń salmaǵy qansha bolatynyn birden bilýge bolady. Soǵym eti qysqa jete me degen suraqtyń da jaýaby tabylady. Bir otbasy sıyr nemese jylqyny bútindeı satyp alsa, ózi jiliktep, saqtaıdy. Sondyqtan tirideı jáne kelilep satyp alýdyń tıimdiligi eki basqa.
Sonymen birge soǵym etin qalaı satatynyna da mán berý kerek. Biri basyn, sıraǵyn jáne ishek-qarny men ókpe-baýyryn da ólsheıdi. Al keıbir satýshylar tek taza etti esepteıdi. Sondyqtan satyp alar kezde soǵym etin jetkizý qyzmetine ne kiretinin surap alǵan durys.
Soǵym baǵasy neni kórsetti?
Qazaqstanda soǵym baǵasynda aıtarlyqtaı aıyrmashylyq bar. Keıbir óńirde jas maldy 225 000 — 350 000 teńgege satyp alýǵa bolady. Al sıyr men bıe etiniń baǵasy 500 000 — 800 000 teńge jáne odan joǵary. Baǵa maldyń jasy, qaıda jaıylǵany, qońdylyǵy men qandaı jilik ekenine qaraı ózgeredi.
Kazinform buǵan deıin elimizdegi shujyq baǵasyn salystyrǵan edi.
