Elimizde syrttaı joǵary bilim alýǵa bola ma

ASTANA. KAZINFORM – Elimizde syrttaı (onlaın) joǵary bilim berýge lıtsenzııasy bar bir ǵana ýnıversıtet bar. Syrttaı oqýǵa qatysty tolyǵyraq Ǵylym jáne joǵary bilim mınıstrligi joǵary jáne joǵary oqý ornynan keıingi bilim komıteti tóraǵasynyń orynbasary Gúljan Jarasova aıtyp berdi.

— 2022 jyly joǵary oqý oryndarynda kúndizgi oqýmen qatar onlaın bilim alýdy kózdeıtin zań qabyldandy. Bul oqytýdyń lıtsenzııalanǵan túri, búginde bir joǵary oqý orny (Satbayev University) stýdentterdi onlaın (syrttaı) oqytýǵa lıtsenzııa aldy. Onlaın oqytý úshin joǵary oqý ornynyń tsıfrlyq nemese onlaın-platformasynyń bolýy ǵana emes, júıeniń daıyndyǵy, sondaı-aq ýnıversıtet onlaın bilim alýshy stýdentterdi áleýmettendirý múmkindigin kórsetýi tıis. Osyǵan baılanysty, qazir joǵary oqý oryndary daıyndyq jumystaryn júrgizip jatqan shyǵar, — dedi Gúljan Jarasova ortalyq kommýnıkatsııalar qyzmeti alańynda ótken baspasóz máslıhatynda. 

Onyń aıtýynsha arnaıy lıtsenzııa alǵan joǵary oqý orny stýdentterdi onlaın oqyta alady. 

— Jalpy qashyqtan oqytý bilim berý baǵdarlamalaryna engizilgen, biraq oqý formatyna jatpaıdy. Búginde bilim berý baǵdarlamalarynyń qurylymy men kúrdeliligine baılanysty 20-dan 50%-ǵa deıin qashyqtan oqytý tehnologııalaryn qoldaný arqyly bilim berýge bolady. Biraq, zańǵa sáıkes tek pedagogıkalyq jáne medıtsınalyq mamandyqtarǵa tyıym salynady, basqa baǵyttar boıynsha joǵary oqý oryndary belsendi qoldanyp jatyr, — deıdi ol.

Aıta keteıik, búginde elimiz Google, Huawei, NVIDIA sekildi halyqaralyq alpaýyt kompanııalarmen yntymaqtastyq ornatyp joǵary bilim salasynda birlesip jumys istep jatyr. 

Buǵan deıin habarlaǵanymyzdaı bıyl ulttyq biryńǵaı testileýde jasandy ıntellekt qoldanylady.