Elimizde sırek jer resýrstarymen jumys isteıtin geologterdi daıarlaýǵa basymdyq beriledi
ASTANA. KAZINFORM – Qazaqstanda sırek jer resýrstary boıynsha jobalardy damytý úshin geolog mamandardy daıarlaýǵa basymdyq berilip jatyr.
Elordada geolog mamandar biliktilikti arttyrý kýrsynan ótti. Oǵan el óńirlerinen kelgen geologtar qatysyp, Leapfrog Geo baǵdarlamasynda modeldeýdi úırendi. Bul — ımplıtsıttik modeldeý algorıtmine negizdelgen zamanaýı úsh ólshemdi geologııalyq modeldeý quraly. Leapfrog Geo júıesi geologııalyq modeldeý salasynda álemdik standart retinde qabyldanǵan. Ony Kanadadan Aýstralııaǵa deıingi jetekshi óndirýshi elder men konsaltıngtik kompanııalar qoldanady.
Baǵdarlama kúrdeli geologııalyq qurylymdardy bir kezeńde, kóptegen derekti paıdalana otyryp qurýǵa múmkindik beredi. Bul ádis geologııalyq qańqalardy qurýdy dástúrli tásilderge qaraǵanda 50%-ǵa deıin jedeldetedi, bul qorlardy baǵalaý men ken ornyn ıgerýdi josparlaý kezinde óte mańyzdy.
– Bul qural geologqa qaı jerde qandaı resýrstar bar ekenin, olardyń qalaı ornalasqanyn jáne modeldiń qanshalyqty shynaıy ekenin naqty ári jedel kórsetýge múmkindik beredi. Ol JORC, KAZRC derekteriniń negizinde halyqaralyq esep qalyptasady jáne olar mıllıondaǵan dollarlyq ınvestıtsııalarǵa áser etedi, – deıdi resýrstyq geolog Marat Vazetdınov.
Qatysýshylardyń aıtýynsha, bastysy — ınterfeısti meńgerý ǵana emes, ınjener jáne resýrstyq analıtık sııaqty oılaýdy úırený.
– Durys emes jasalǵan geologııalyq boljam barlyq modeldi ózgertip jiberedi, demek búkil qarjylyq boljamǵa áser etedi. Sondyqtan biz adamdardy jaı ǵana «batyrma basýǵa» emes, ne úshin jáne neni modeldep jatqanyn túsinýge úıretemiz, – deıdi Marat Vazetdınov.
Onyń aıtýynsha, salanyń ózekti máseleleriniń biri mamandardy qaıta daıarlaý bolyp otyr.
– Kóptegen keremet geolog zamanaýı baǵdarlamalarmen jumys isteı almaıdy, sebebi olarda oqýǵa múmkindik bolmaǵan. Al qazir bul artyqshylyq emes, qajettilikke aınaldy. Biz geologııany ǵana emes, tsıfrlyq ortany da túsinetin kadrsyz salany damyta almaımyz, – deıdi sarapshy.
Aıta ketsek, 5 sáýir – geolog kúni qarsańynda Prezıdent Qasym-Jomart Toqaevtyń atynan Premer-mınıstr Oljas Bektenov geologııa salasynyń mamandaryna memlekettik nagradalardy tabys etti.
Eske sala ketsek, Qazaqstanda geologııa salasyn damytýdyń 2026 jylǵa deıingi tujyrymdamasy bar.
Byltyr Úkimet basshysy Geologııa jáne jer qoınaýyn qorǵaý mınıstrligin qurýǵa qatysty pikir aıtqan edi.