Elimizde Sybaılas jemqorlyqqa qarsy jańa standart bekitildi
ASTANA. KAZINFORM — QR Ulttyq ekonomıka mınıstrligi parasattylyq mádenıetin damytýǵa jáne memlekettik basqarýdaǵy sybaılas jemqorlyq kórinisteriniń aldyn alý júıesin nyǵaıtýǵa arnalǵan Sybaılas jemqorlyqqa qarsy jańa standartty bekitti. Bul týraly vedomstvonyń resmı saıtynda jarııalandy.
Qujat «Sybaılas jemqorlyqqa qarsy is-qımyl týraly» Zańdy oryndaý maqsatynda ázirlengen. Sybaılas jemqorlyq qaterin taldaý men kartaǵa túsirý, múddeler qaqtyǵysyn retteý, satyp alý rásiminiń ashyqtyǵyn arttyrý jáne qoǵammen ashyq dıalog qalyptastyrýdyń biryńǵaı tásilin bekitedi.
Jańa standartta mynalar qarastyrylǵan:
- sybaılas jemqorlyq qaterin turaqty túrde taldaýdyń ınteraktıvti kartasyn qalyptastyrý;
- múddeler qaqtyǵysyn retteý erejeleri, syılyq alý men saparlaýǵa qatysty shekteýler;
- qyzmetkerlerdi mindetti oqytý jáne sybaılas jemqorlyqqa qarsy taqyryp boıynsha bilimderin testileý;
- mınıstrliktiń resmı saıtynda negizgi josparlar men esepterdi jarııalaý, sondaı-aq Qoǵamdyq keńestiń qatysýy;
- básekelestikke basymdyq bere otyryp, memlekettik satyp alý rásimin baqylaýdy kúsheıtý.
— Standartty qabyldaý Qazaqstannyń Sybaılas jemqorlyqqa qarsy saıasat tujyrymdamasyn iske asyrýdaǵy mańyzdy qadamy ári memlekettik organdar qyzmetiniń ashyqtyǵyn arttyrýǵa, azamattar men bıznestiń senimin nyǵaıtýǵa qyzmet etedi, — delingen aqparatta.
Sybaılas jemqorlyqqa qarsy standarttyń tolyq mátini mınıstrliktiń resmı saıtynda jarııalanǵan.
Eske salsaq, QR Ulttyq ekonomıka vıtse-mınıstri Azamat Ámrın fermerler qosymsha qun salyǵyn tóleýdi jón sanaıtyndyǵyn aıtqan bolatyn.