Elimizde shomylý maýsymy bastalǵaly zań buzǵan 525 adamǵa aıyppul salynǵan
ASTANA. KAZINFORM - Sýdaǵy qaıǵyly oqıǵalardyń aldyn alý jáne azamattardyń qaýipsizdik mádenıetin qalyptastyrý maqsatynda Tótenshe jaǵdaılar mınıstrliginiń qyzmetkerleri belsendi profılaktıkalyq jumys júrgizýde.
Mınıstrliktiń baspasóz qyzmetiniń habarlaýynsha, qutqarýshylar balalardyń qaýipsizdigine erekshe nazar aýdarady.
Jyl basynan beri TJM qyzmetkerleri basseınderde 20 myńnan astam balany júzýge úıretken. Búgingi kúni elimizdiń sý aıdyndarynda shomylýǵa ruqsat etilgen 612 oryn bar. Olarda sýǵa shomylýǵa bolmaıtyny jáne tyıym salynǵany týraly 6 587 eskertý belgisi ornatylǵan.
Shomylý maýsymy bastalǵanǵa deıin ІІM, ákimdikter jáne eriktilermen birlesip 20 myńnan astam reıd júrgizildi. Reıdtik is-sharalardyń nátıjesinde zań talaptaryn buzǵan 525 adam ákimshilik jaýapkershilikke tartyldy.
Shomylý maýsymy bastalǵannan beri Qazaqstan TJM qutqarýshylary 13 adamdy qutqardy. Alaıda, jazǵy kezeńniń birinshi onkúndiginde sýdaǵy qaýipsizdik erejelerin saqtamaý saldarynan 8 azamattyń qaza bolý faktileri tirkeldi, onyń 4-ýi kámeletke tolmaǵan balalar. Osyǵan baılanysty TJ mınıstri general-maıor Shyńǵys Árinov baqylaý sharalaryn kúsheıtýdi jáne sý aıdyndarynda saǵat saıyn reıd júrgizýdi tapsyrdy.
Búgin Astanada vedomstvo basshysy Esil ózeniniń jaǵalaý boıyn tekserip, elordalyq jedel qutqarý jasaǵyna birqatar naqty tapsyrma berdi.
«Sý aıdyndaryndaǵy jazataıym oqıǵalardyń kópshiligi ruqsat etilmegen jáne jabdyqtalmaǵan sý kózderinde bolady. Árbir azamat sý aıdyndaryndaǵy qaýipsizdik erejelerin qatań saqtaýy tıis»,-delingen habarlamada.
Osy rette mynadaı keńes beredi:
Ruqsat etilgen, qaýipsiz sý qoımalarynda demalyńyz.
Balalardy sý aıdyndarynyń janynda qaraýsyz qaldyrmańyz jáne eresekterdiń erip júrýinsiz, olardyń shomylýyna jol bermeńiz.
Beıtanys jáne shomylýǵa jabdyqtalmaǵan jerlerde, sondaı-aq «Shomylýǵa tyıym salynady», «Súńgýge tyıym salynady», «Qaýipti», «Sý ıirimi» belgileri ornatylǵan jerlerde shomylýǵa bolmaıdy.
Mas kúıinde shomylýǵa bolmaıdy.
Júzý shekaralaryn belgileıtin býıkalardan tys júzýge bolmaıdy.
Shaǵyn kólemdi kemelerge jáne basqa júzý quraldaryna jaqyn júzýge bolmaıdy.
Tekserilmegen jáne jabdyqtalmaǵan jerlerde súńgýge bolmaıdy.
Júzýge arnalmaǵan zattarmen júzýge bolmaıdy.
Qaıyqtardan, qaıyqtardan, aılaqtardan, tabıǵı túzilimderden (jartastar, tastar, parapetter, qorshaýlar jáne basqa da zattar), sondaı-aq osy maqsattarǵa beıimdelmegen qurylystardan sýǵa sekirmeńiz.
