Elimizde shildeden bastap ÚEU-ǵa memlekettik grant berý erejeleri jańartylady
ASTANA. KAZINFORM – Bıyl shilde aıynan bastap Qazaqstan Respýblıkasynda úkimettik emes uıymdarǵa (ÚEU) memlekettik granttardy ázirleý, berý, monıtorıng júrgizý jáne tıimdiligin baǵalaý boıynsha jańartylǵan Erejeler kúshine enedi. Bul týraly Mádenıet jáne aqparat mınıstrliginiń baspasóz qyzmeti málimdedi.
Bul — azamattyq qoǵam ınstıtýttaryn memlekettik qoldaý júıesin barynsha ashyq, nátıjeli ári yńǵaıly etýge baǵyttalǵan granttyq júıeni reformalaýdyń sońǵy kezeńi. Reforma aıasynda normatıvtik-quqyqtyq baza da, negizgi operatsııalyq rásimder de jańartylyp, áleýmettik áserge baǵdarlanǵan jáne qarjylandyrý úlgisine kóshý júzege asty.
Jańartylǵan Erejeler turaqty áleýmettik nátıjelerge qol jetkizýge, rásimderdiń ashyqtyǵyna jáne múddeli taraptardyń belsendi qatysýyna basymdyq beredi.
Negizgi jańalyqtar:
– Eki kezeńdi irikteý mehanızmi:
Endi jobalar aldymen táýelsiz saraptamalyq baǵalaýdan ótedi, sodan keıin Operator, Tapsyrys berýshi jáne ÚEU ókilderi qatysatyn konkýrstyq komıssııa sheshim qabyldaıdy. Bul tásil sýbektıvtilikti azaıtyp, barlyq taraptardyń qatysýyn arttyrady.
– Ákimshilik shaǵymdaný múmkindigi:
Konkýrstyq irikteý nátıjelerin sotqa júginbeı-aq ákimshilik tártippen shaǵymdanýǵa bolady. Bul rásimderge degen senimdi arttyryp, shaǵymdardy jedel qaraýǵa jaǵdaı jasaıdy.
– Jergilikti atqarýshy organdardyń ókilettikterin keńeıtý:
Endi ákimdikter 3 jylǵa deıingi orta jáne uzaq merzimdi granttar bóle alady. Bul aımaqtyq deńgeıde áleýmettik mańyzy bar bastamalardy turaqty, boljamdy ári strategııalyq josparlaýǵa múmkindik beredi.
– Jobalardy baǵalaý krıterııleriniń jańarýy:
Endi jobalar sapalyq kórsetkishterge — kúıiletin áleýmettik áserge, maqsatty aımaqty qamtý aýqymyna, aýdıtorııany tartý deńgeıine jáne bastamalardy júzege asyrý qoljetimdigine qaraı baǵalanady.
Mádenıet jáne aqparat mınıstrligi men «Azamattyq bastamalardy qoldaý ortalyǵy» KEAQ jobalardy júzege asyrýdyń barlyq kezeńinde grant alýshylarǵa ádistemelik jáne ákimshilik qoldaý kórsetýdi jalǵastyrady.
Aıta keteıik, «Azamattyq bastamalardy qoldaý ortalyǵy» KeAQ tóraıymy Lıma Dıas ÚEU-dy memlekettik qarjylandyrý jaıyn, onyń qalaı jumys isteıtinin jáne memlekettik emes sektorda memlekettik qarjylandyrýdy bólý kezinde tártipter men zańdylyqtardyń saqtalýyna kim jaýap beretinine qysqasha toqtaldy.