Elimizde sheteldik týrısterdi qabyldaýǵa daıyn 5-6 ǵana aımaq bar — Danıel Serjanuly
ASTANA. KAZINFORM — Elimizde sheteldik týrısterdi qabyldaýǵa daıyn 5-6 ǵana aımaq bar. Bul týraly «Jibek Joly» telearnasynyń «Ýáde» baǵdarlamasyna suhbat bergen «Kazakh Tourism» UK» AQ Basqarma tóraǵasynyń mindetin atqarýshy Danıel Serjanuly aıtty.
— Barlyq baǵytty birdeı sheteldikterge jarnamalaı bermeımiz. Muny túsiný kerek. Óıtkeni, sheteldik týrısti qabyldaýǵa daıyn aımaqtar 5-6 ǵana. Onyń ishinde Almaty qalasy, Almaty oblysy, Túrkistan, Mańǵystaý jáne Shyǵys Qazaqstannyń Qatonqaraǵaıy bar. Astana men Býrabaıdy bir baǵyt retinde jarnamalaımyz. Basqa óńirlerge týrısterdi jappaı shaqyrýǵa eshqandaı múmkindik bolmaı tur. Sebebi olarda daıyn ınfraqurylym joq. Al jazda syn aıtylǵan naqty baǵyttar negizinen ishki týrıster baratyn jerler. Iá, olarǵa da sheteldik týrıster barady, biraq kóp emes, — dedi Danıel Serjanuly.
Onyń aıtýynsha, syrttan keletin týrıster el ekonomıkasyna valıýta ákeledi. Ótken jyly sheteldik týrısterge kórsetiletin qyzmetter eksportynyń kólemi 2,6 mlrd dollar boldy.
— Kóp dep aıtýǵa kelmeıdi. Sebebi onyń jalpy ishki ónimdegi úlesi birneshe paıyz ǵana. Al damyǵan elderde 10 paıyzdan asyp, 20-30 mlrd dollarǵa jetedi. 10 ese aıyrmashylyq bar. Týrızmniń basty maqsaty — shetelden valıýta ákelip, jergilikti halyqtyń paıdasyna jaratý. Al ishki týrızmdi áleýmettik baǵyttyń biri retinde damytamyz. Óıtkeni, halyqqa rekreatsııa kerek. Rekreatsııa — degenimiz jumys istegen adamnyń demalys kezinde ózin-ózi qalpyna keltirýi. Sol úshin adamdar Balqashqa, Alakólge baryp demalady, — dedi ol.
Danıel Serjanulynyń atap ótýinshe, joǵaryda atalǵan 6 óńirden basqa aımaqtarda ınfraqurylym jaqsy damymaǵan. Jol boıynda servıster de nashar. Al sheteldik qonaqtardyń tilinde qyzmet kórsete alatyn gıd mamandary tapshy. 3 jáne 4 juldyzdy qonaq úıler jetispeıdi.
Aıta keteıik, taıaýda Májilis depýtaty Erbolat Saýryqov Premer-mınıstr Oljas Bektenovtiń atyna saýal joldap, ishki týrızmdi damytýdyń ulttyq baǵdarlamasyn qabyldaýdy usynǵan edi.
Osydan buryn Qazaqstan qaı elderden týrısterdi tartýǵa ekpin qoıyp otyrǵanyn jazǵanbyz.