Elimizde sharýalardyń máselelerin qaraıtyn arnaıy jumys toby quryldy
ASTANA. KAZINFORM – Premer-Mınıstrdiń orynbasary Serik Jumanǵarın elimizde paıdalanylmaǵan jáne zańsyz berilgen jerlerdi memleketke qaıtarý máselesin kóterdi.
«2022-2023 jyldary komıssııa paıdalanylmaǵan jáne zańsyz berilgen 10 mln ga aýyl sharýashylyǵy jerlerin memlekettik menshikke qaıtardy. Onyń ishinde 4,3 mln ga jer qaıta aınalymǵa jiberildi. Bıyl 2 mln ga aýyl sharýashylyǵy jerlerin qaıtarý josparlanǵan, búginde 1,3 mln ga jer qaıtaryldy. Jer resýrstaryn tıimdi basqarý úshin komıssııanyń qyzmeti tolyǵymen qaıta formattaldy. Endi komıssııanyń negizgi fýnktsııasyna jerlerdi utymdy paıdalanylýyn baqylaýdy kúsheıtý jáne qaıtarylǵan aýyl sharýashylyǵy maqsatyndaǵy jerlerdi qaıta bólý kiredi», - dedi Serik Jumanǵarın Úkimet otyrysynda.
Sonymen qatar vıtse-premer sharýalardyń máselelerin sheshý maqsatynda arnaıy jumys toby qurylǵanyn aıtty.
«Jumys tobynyń birinshi otyrysy bıyl 10 qyrkúıekke josparlandy. Sonymen qatar jaýapsyz tulǵalarmen jasalǵan sharttardy birjaqty tártippen buzý praktıkasyn engizý máselesi pysyqtalady. Jer resýrstaryn basqarý komıteti men onyń aýmaqtyq bólimsheleriniń jerlerdi qaıtarý jónindegi is-áreketteri qoldanystaǵy zańnamaǵa qaıshy kelmeıtinin atap ótken jón», - deıdi ol.
