Elimizde shaǵyn jáne orta bıznestegi jumys oryndarynyń sany 36,7%-ǵa ósti
ASTANA. KAZINFORM — Ulttyq ekonomıka mınıstrligi ShOB Qazaqstan eńbek naryǵynyń negizgi qozǵaýshy kúshine aınalǵanyn málimdep, salanyń damý barysy jóninde aqparat berdi.
— Ulttyq statıstıka bıýrosynyń derekterine sáıkes, búginde ShOB sektorynda 4 527 381 adam jumyspen qamtylǵan. Bul — eldegi jalpy jumyspen qamtylǵan halyqtyń 48,6%-y. Sońǵy 7 jylda sektordaǵy jumys oryndarynyń sany 36,7%-ǵa ósti (2018 jyly — 3,3 mln), — delingen habarlamada.
Sonymen qatar, jumys istep turǵan ShOB sýbektileriniń sany 63,5%-ǵa artyp, 2,2 mln birlikke jetti. Sonyń arqasynda ónim shyǵarý kólemi 3,2 ese ulǵaıyp, 2025 jyldyń qorytyndysy boıynsha rekordtyq 104,8 trln teńge kórsetkishi tirkeldi. Al ShOB-tyń el JІÓ-sindegi úlesi 9,2%-ǵa joǵarylap, 40,9% boldy.
— Sektordyń negizin burynǵysynsha jeke kásipkerler quraıdy. Olar sýbektilerdiń jalpy sanynyń 69%-yn qamtyp, 2 mln-nan astam adamdy jumyspen qamtamasyz etip otyr. Sonymen qatar, orta kásiporyndar naryqtyń nebári 0,1%-yn quraǵanymen, tolyq áleýmettik paket usynatyn neǵurlym turaqty jumys oryndaryn qamtamasyz etedi. Bul kásiporyndarda 428,2 myń adam jumys isteıdi, — dep málimdedi mınıstrlik.
Al eldegi kásiporyndar sany boıynsha saýda salasy kósh bastap tur (35%). Degenmen, bıznesti keńeıtý arqyly jańa jumys oryndaryn qurý áleýeti óńdeý ónerkásibinde, qurylysta jáne agroóńdeý salasynda joǵary.
Odan bólek, sektorda áıelderdiń róli aıtarlyqtaı. Olar barlyq ShOB sýbektileriniń 48,1%-yn basqarady. Jeke kásipkerler arasynda áıelderdiń úlesi 52,6% bolsa, zańdy tulǵalar arasynda — 28,1%.
Aıta keteıik, buǵan deıin ShOB ósimi 20%-dan asqanyn jáne bıznesti tekserý azaıyp, qoldaý kúsheıgenin jazǵanbyz.
