Elimizde seısmıkalyq aýdandastyrý kartasyn ázirleý qolǵa alyndy ma
ALMATY.KAZINFORM – Almaty jáne Óskemen qalalaryna shaǵyn seısmıkalyq aýdandastyrý kartalary jasaldy. Bul týraly Kazinform agenttigine Ulttyq seısmologııalyq baıqaý jáne zertteýler ulttyq ǵylymı ortalyǵy dırektorynyń ǵylym jónindegi orynbasary Elızaveta Esenjigitova aıtty.
«Seısmıkalyq jalpy, naqty jáne shaǵyn aýdandastyrý kartalaryn seısmıkalyq qaýipti óńirlerge jáne eldi-mekenderge jasaý jumystary jalǵasyp jatyr. Sońǵy jyldary, atap aıtqanda Qazaqstan aýmaǵy úshin jalpy aýdandastyrý kartasy, Almaty, Jetisý, Abaı, Shyǵys-Kazaqstan jáne Jambyl oblystarynyń naqty seısmıkalyq aýdandastyrý, Almaty jáne Óskemen qalalaryna shaǵyn seısmıkalyq aýdandastyrý kartalary jasaldy. Aldaǵy 2024-2026 jyldary Taraz qalasyna shaǵyn seısmıkalyq aýdandastyrý, Túrkistan men Mańǵystaý oblystaryna naqty seısmıkalyq aýdandastyrý kartalaryn jasaý kózdelgen», – deıdi ol.
Elızaveta Esenjigitovanyń aıtýynsha, júrgizilgen zertteýlerdiń nátıjesinde jasalǵan kartalar, atalmysh óńirler men eldi-mekenderde silkiniske tózimdi qurylys jumystaryn júrgizýge negiz bolady.
Eske salaıyq, Memleket basshysynyń tapsyrmasyn oryndaý úshin Seısmologııa salasyn damytýdyń 2024-2028 jyldarǵa arnalǵan keshendi jospary bekitilgen bolatyn.
Qujat elimizdiń seısmologııalyq qaýipsizdigin nyǵaıtý boıynsha aýqymdy sharalardy iske asyrýdy kózdeıdi. Olardyń ishinde monıtorıngti aıtarlyqtaı kúsheıtý, ǵımarattar men qurylystardyń seısmıkalyq tózimdiligin qamtamasyz etý, jańa tsıfrlyq tehnologııalardy engizý, kadrlardy daıarlaý deńgeıin arttyrý jáne taǵy basqasy bar.
Osylaısha, 15 seısmıkalyq aýdandastyrý kartasy ázirlenetin bolady, bul elimizdiń seısmıkalyq qaýipti óńirlerindegi jer silkinisi oshaqtarynyń 70%-yn boljaýǵa múmkindik beredi. Sondaı-aq olar atalǵan aýmaqtardaǵy ǵımarattar men qurylystardy pasporttaýǵa jáne jańa qurylys normalaryn ázirleýge negiz bolady.
Osyǵan deıin Seısmologııa ınstıtýty dırektorynyń orynbasary Nursársen Ózbekov Qazaqstanda qurylys seısmıkalyq erejege sáıkes júrgiziletini týraly aıtqan edi.
