Elimizde satylatyn bıologııalyq belsendi qospalardyń qaýipsizdigine kim jaýap beredi
ASTANA. KAZINFORM – Qazaqstanda bıologııalyq belsendi qospalar dárilik zattarǵa jatpaıdy, alaıda olardy naryqqa shyǵarý úshin memlekettik tirkeýden ótkizý mindetti. BBQ-nyń qaýipsizdigi qalaı tekseriletini jáne satylymǵa qandaı talappen jiberiletini týraly Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti Kazinform agenttiginiń resmı saýalyna bergen jaýabynda túsindirdi.
Komıtet tóraǵasynyń orynbasary Nurqan Sádýaqasovtyń málimetinshe, Qazaqstanda BBQ aınalymy Eýrazııalyq ekonomıkalyq odaq zańnamasymen retteledi. «Tamaq ónimderiniń qaýipsizdigi týraly» Keden odaǵynyń tehnıkalyq reglamentine sáıkes, mundaı ónimder mindetti memlekettik tirkeýden ótedi.
– BBQ-ny tirkeý kezinde ǵylymı uıymdar daıyndaǵan saraptamalyq qorytyndylar men ǵylymı esepter negizge alynady. Atap aıtqanda, balalar men eresekterge arnalǵan taǵamdyq jáne bıologııalyq belsendi zattardyń táýliktik tutyný mólsherine saraptama jasalady. Osy qujattardyń negizinde memlekettik tirkeýdi EAEO elderiniń densaýlyq saqtaý organdary júrgizedi, - dedi spıker.
Onyń sózinshe, tirkeýden ótken ónim Memlekettik tirkeý týraly kýálikterdiń biryńǵaı tizilimine engiziledi. Onda BBQ-nyń qoldaný salasy, ony paıdalaný jónindegi usynymdar, qarsy kórsetilimder, saqtaý sharttary men óndirýshi týraly negizgi málimetter kórsetiledi. Tizilim EAEO-nyń resmı ınternet-resýrsynda ashyq jarııalanady.
Sonymen birge komıtet tóraǵasy orynbasary BBQ naryqqa shyqqannan keıin de baqylaý jalǵasatynyn atap ótti.
– Máselen, 2025–2026 jyldary baqylaý maqsatynda BBQ-nyń 545 synamasy zertteldi. Sonyń 105-i nemese 19,3%-y belgilengen talaptarǵa saı bolmaı shyqty. Olardyń basym bóligi – 94,6%-y tańbalaýǵa, taǵy 5,4%-y mıkrobıologııalyq kórsetkishterge qatysty boldy, - dedi Nurqan Sádýaqasov.
Anyqtalǵan jaǵdaılar boıynsha 105 jedel shara qabyldanyp, 72 keliden astam talapqa sáıkes kelmeıtin BBQ satylymnan alynyp tastalǵan.
– Sondaı-aq baqylaý tek saýda oryndarymen shektelmeıdi. 2024 jyldan bastap mınıstrlik BAQ-ta jarııalanatyn BBQ jarnamasyna monıtorıng júrgizip, talaptardyń saqtalýyn qashyqtan baqylap keledi. Osylaısha, 2025–2026 jyldary áleýmettik jelilerdegi 8,5 myń jarnama taratýshyǵa monıtorıng jasalyp, memlekettik tirkeýden ótpegen BBQ satýǵa qatysty 2 myń onlaın-platformada jarnama talaptaryn buzǵany anyqtaldy, - dedi spıker.
Budan bólek, Mádenıet jáne aqparat mınıstrliginiń Aqparat komıteti osy kezeńde jarnama talaptaryn buzǵan 23-ten astam akkaýntty joıǵan.
