Elimizde «Sarbaz 2.0» teleserıalynyń túsirilimi bastaldy
ASTANA. KAZINFORM — Almaty oblysyndaǵy 78460 áskerı bóliminde kóp serııaly «Sarbaz 2.0» televızııalyq fılminiń túsirilimi júrip jatyr, dep habarlaıdy Qorǵanys mınıstrliginiń baspasóz qyzmeti.
«Habar» agenttigi AQ-nyń tapsyrysy boıynsha qolǵa alynǵan bul joba Qazaqstan Qorǵanys mınıstrliginiń qoldaýymen júzege asyrylmaq.
Túsirilimniń bastalýyna arnalǵan saltanatty rásimge Qorǵanys mınıstriniń keńesshisi Áıgerim Aǵyltaeva, «Habar» telearnasynyń dırektory Erlan Atambaı, túsirý tobynyń músheleri, akterler, sondaı-aq, áskerı bólimniń qolbasshylyǵy men jeke quramy qatysty.
Kınogerlerdiń qalyptasqan dástúri boıynsha joba ataýy men túsirý toby músheleriniń esimderi jazylǵan tárelke syndyryldy. Bul rásim serıaldyń sátti ótýin bildiretin jaqsy yrym sanalady. Tárelkeni syndyrý qurmetin qoıýshy rejısser Maqsat Ospanov ıelendi. Іs-shara sońynda tárelke synyqtary qatysýshylarǵa estelik retinde taratyldy.
Serıaldyń negizgi jelisi jastardyń kásibı jáne tulǵalyq damýyna jańa múmkindikter usynatyn Qorǵanys mınıstrligi júzege asyryp otyrǵan «Sarbaz 2.0» biregeı baǵdarlamasyna negizdelgen.
— Merzimdi áskerı qyzmetshiler jaýyngerlik daıyndyqtan bólek, zamanaýı baǵyttar boıynsha qosymsha bilim alady. Atap aıtqanda, Astana Hub uıymdastyrýymen IT salasy, radıobaılanys jáne jelilik tehnologııalar boıynsha arnaıy kýrstardan ótedi. Sondaı-aq sarbazdar aǵylshyn tilin meńgerip, aqparattyq tehnologııalar, jasandy ıntellekt, kıberqaýipsizdik baǵyttary boıynsha bilimin jetildiredi. Budan bólek, olar ushqyshsyz basqarylatyn apparattardy paıdalaný jáne basqarý daǵdylaryn úırenedi, — dedi 78460 áskerı bólimi komandıriniń orynbasary podpolkovnık Seıfýlla Isahov.
Serıaldyń sıýjetinde áskerde minezderi shyńdalyp, tulǵalyq qasıeti qalyptasqan qazaqstandyq sarbazdardyń jańa býyny beınelenedi.
Fılmniń basty keıipkeri — Álıhan esimdi jas jigit. Ulttyq biryńǵaı testileýden qajetti upaı jınaı almaı, qarjylyq qıyndyqqa tap bolǵan ol ásker qataryna barýǵa sheshim qabyldaıdy. Alǵashynda bul qadamy amalsyz jasalǵandaı kóringenimen, ýaqyt óte kele áskerı orta ómirge degen kózqarasyn ózgertip, jaýapkershiligin arttyryp, kóshbasshylyq qasıetin qalyptastyrýyna yqpal etedi.
— Serıal áskerı qyzmettiń jas adamnyń tulǵa bolyp qalyptasýyna qalaı áser etetinin kórsetedi. Keıipkerdiń beıqam jastyq shaqtan jaýapkershiligi mol kemeldikke, ómirdegi naqty maqsatqa, ózine degen kúmánnan óz kúshine degen senimge qaraı jasaǵan qadamyn baıandaıdy, — delingen habarlamada.
Bas keıipker Álıhannyń rólin Almas Aqylbaı, al onyń anasy Altynnyń beınesin Kamalııa Baıtileýova somdaıdy. Sonymen qatar fılmde Ámına Esimhan (Ásel), Jalǵas Tolǵanbaı (podpolkovnık Mombekov) jáne Kenjebek Basharov (Asqar) sekildi akterler de oınaıdy.
Osyǵan deıin Qazaqstan áskerinde sarbazdar pikiri negizinde komandırler reıtıngi jasalǵanyn jazdyq.
