Elimizde salyqtyq ákimshilendirýdiń ıntegratsııalanǵan júıesi engizilmek

ASTANA. KAZINFORM — Úkimettiń baspasóz ortalyǵy alańynda ótken baspasóz konferentsııasynda Premer-mınıstrdiń orynbasary – ulttyq ekonomıka mınıstri Serik Jumanǵarın Memleket basshysynyń salyq salasyn reformalaý jónindegi tapsyrmalarynyń oryndalý barysy týraly aıtty.

Vıtse-premer 2025 jylǵy 18 shildede Memleket basshysy kelesi jyldyń 1 qańtarynan bastap kúshine enetin jańa Salyq kodeksine jáne ilespe zańǵa qol qoıǵanyn atap ótti. 

Prezıdenttiń tapsyrmasy boıynsha protsesterdi, memlekettik qyzmetterdi jáne salyq tóleýshilermen elektrondy ózara is-qımyldy avtomattandyratyn salyqtyq ákimshilendirýdiń ıntegratsııalanǵan júıesi engizilýde.

Salyqtardy avtomattandyrylǵan esepteý jáne salyq tóleýshiniń qujattamasyn qalyptastyrý úshin Smart Data Finance júıesi óndiristik qoldanysqa engizildi. 

Memlekettik organdarmen 64 ıntegratsııa júzege asyryldy, derekter kólik jáne múlik salyǵyn esepteýde, kameraldy baqylaý jáne jalpyǵa birdeı deklaratsııalaý kezinde qoldanylady.

— Jańa kodeks — bul Bıýdjet kodeksi qabyldanǵannan keıingi bıýdjettik-salyq reformasynyń ekinshi kezeńi. Úshinshi kezeń — ekonomıkanyń naqty sektoryn aýqymdy qarjylandyrý. Atalǵan baǵdarlamanyń operatory — qoldaý kólemin 8 trln teńgege deıin jetkizý úshin kapıtaldandyrýy 1 trln teńgege ulǵaıtylǵan «Báıterek» holdıngi. Bul, esepteýler boıynsha, 2025 jyly JІÓ ósiminiń shamamen 1,3%-yn qamtamasyz etedi, — dep atap ótti Serik Jumanǵarın.

Buǵan deıin habarlanǵandaı, vıtse-premer qurylys salasy el ekonomıkasynda turaqty ósim kórsetip otyrǵanyn, qurylys jumystarynyń ósýi 18,5%-ǵa deıin jedeldegenin, 9,4 mln sharshy metr turǵyn úı paıdalanýǵa berilgenin málim etti. Bul ótken jylǵy tıisti kezeńnen 5,2%-ǵa artyq.