Elimizde salyq bereshegin óndirip alý tártibi qaıta qaralady

ASTANA. KAZINFORM – Memlekettik kiris komıteti Aýdıt departamentiniń basqarma basshysy Qaısar Aryn qaı jaǵdaıda salyq organdary boryshkerlerdiń múlkine óndirip alý sharasyn qoldanatynyn túsindirdi.

Bastapqyda salyq tóleýshige bereshegin óz betinshe óteýge múmkindik beriledi. Osydan keıin salyq tóleýshi tólemdi ótemese, májbúrlep óndirip alý is-qımyldary jasalady. 

- Zańdy tulǵalar, jeke kásipkerler salyqty ýaqytynda tólemegende, Salyq kodeksi aıasynda habarlama joldanady. Bul rette táýekel dárejesi bar. ıAǵnı joǵary dárejeli táýekel bolsa, habarlama jiberilgennen keıin, bir jumys kúni ishinde biz múlkine shekteý is-qıyldaryn atqarýymyz kerek. Al orta dárejeli táýekel aımaǵynda bolsa, onda 15 jumys kúninde múlkin shekteý jumystaryn júzege asyramyz. Osy tártip Salyq kodeksiniń 120-babynda kórsetilgen.

Múlkin shekteý degenimiz ne? Salyq tóleýshiniń tirkeýge qoıylǵan múlkine baılanysty jáne býhgaterlik teńgeriminde turǵan múlikine shekteý qoıamyz. Sonymen qatar, óndirip alý is-qımyldaryn atqaramyz, - dedi komıtet ókili elordada ótken brıfıngide.

Munymen qosa Q. Aryn qazir Parlament Májilisinde qaralyp jatqan jańa Salyq kodeksinde ózgeshe tetikter pysyqtalyp jatqanyn atap ótti. Jańa Salyq kodeksinde saralanǵan tásil qarastyrylǵan. Qazir 180 myńǵa jýyq boryshker bolsa, onyń 60 paıyzynyń 20 AEK-ke deıin (78 640 teńge) qaryzy bar.

Onyń aıtýynsha, jańa kodeks jobasyna vedomstvo tıisti usynys jasaǵan. Eger salyq tóleýshiniń aıyppuldy, ósimpuldy jáne negizgi salyqty qosqandaǵy jalpy somasy 20 AEK-ke deıin (78 640 teńge) qaryzy bolsa, onda salyq organy eskertý jiberýmen shekteledi. Basqa eshqandaı jaza qoldanylmaıdy.

- Budan bólek, 20-dan 45 AEK-ke deıingi (78 640 - 176 940 teńge) qaryzdar boıynsha bank shottarynyń shyǵys operatsııalary men kassa boıynsha shyǵys operatsııalardy toqtata turý ókimi shyǵarylyp, onda salyq bereshegin óteý merzimin kórsete otyryp, habarlama jiberýmen shektelemiz, - dedi Q. Aryn. 

Onyń sózine qaraǵanda, atalǵan qadamdar qaryzdy óndirip alýǵa ákelmese, onda 45 AEK-ten (176 940 teńge) joǵary bereshek kezinde ósimpuldy tolyq esepteý, bank shottary men kassalar boıynsha shyǵys operatsııalaryn buǵattaý, ınkassalyq ókim shyǵarý, múlikti túgendeý jáne basqa da is-sharalar atqarylady. 

Buǵan deıin memleket aldynda qaryzy bar kompanııalardyń kóbine is qozǵalǵanyn jazǵan edik.