Elimizde «Salaýatty jaz» profılaktıkalyq naýqany bastaldy
ASTANA. KAZINFORM –Densaýlyq saqtaý mınıstrligi balalardyń jaz mezgilindegi densaýlyǵyn saqtaýǵa baǵyttalǵan jyl saıynǵy «Salaýatty jaz» profılaktıkalyq naýqanynyń bastalǵanyn jarııalady.
Baǵdarlama búkil jaz maýsymyn qamtıdy jáne medıtsınalyq tekserýlerdi, aǵartýshylyq aktsııalardy, mektep medıtsına qyzmetkerlerin oqytýdy jáne basqa da is-sharalardy qamtıdy.
Naýqannyń sheńberinde óńirler men aýyldyq eldi mekenderge quramynda pedıatrlar, oftalmologtar, stomatologtar, hırýrgter jáne ózge de mamandar jumys isteıtin jyljymaly medıtsınalyq keshender jiberiledi. Sondaı-aq negizgi kezeńde tekserýden ótpegen balalar úshin qosymsha tekserýler uıymdastyrylyp, medıtsınalyq uıymdarda turaqty túrde «Ashyq esik kúnderi» men «Densaýlyǵyńdy tekser» aktsııalary ótkiziledi.
Sozylmaly aýrýlary bar balalarǵa erekshe nazar aýdarylady. «Salaýatty jaz» baǵdarlamasy sheńberinde olar qajetti saýyqtyrý sharalarymen jáne medıtsınalyq baqylaýmen qamtamasyz etiledi. Budan bólek, baǵdarlama sheńberinde buqaralyq aqparat quraldarynda, áleýmettik jelilerde, mektep janyndaǵy jáne jazǵy lagerlerde keń kólemdi aqparattyq-túsindirý jumystary júrgiziledi.
Ata-analar men balalarǵa ınfektsııalyq aýrýlardyń aldyn alý, qaýipsizdik jáne psıhoemotsıonaldyq densaýlyq máseleleri boıynsha jadynamalar, beınerolıkter men ınfografıkalar qoljetimdi bolady.
Densaýlyq saqtaý mınıstrligi ata-analardy balalardyń jazǵy demalysyn qaýipsiz ári densaýlyqqa paıdaly etý úshin naýqanǵa belsendi qatysýǵa shaqyrady.
Aıta keteıik, 2026 jylǵy 1 sáýirden bastap elimizde alǵash ret balalar saýyqtyrý ortalyqtarynyń qyzmetin lıtsenzııalaý júıesi engizildi.
