Elimizde saǵat 20:00–den keıin alkogol satylmaýy múmkin
ASTANA. KAZINFORM — Májilis depýtaty Magerram Magerramov Premer-mınıstr Oljas Bektenovke joldaǵan depýtattyq saýalynda eldegi alkogol ónimderi aınalymyna qoıylatyn talaptardy qatańdatýdy usyndy.
Depýtat Іshki ister mınıstrliginiń deregin keltirdi jáne elde jasalatyn árbir ekinshi kisi óltirý, árbir úshinshi zorlaý men buzaqylyq mas kúıinde bolatynyn aıtty.
Sondaı-aq tonaý, jol-kólik oqıǵalarynyń árbir tórtinshisi jáne turmystyq zorlyq-zombylyq quqyqbuzýshylyqtarynyń jartysynan astamy ishimdikke mas kúıde jasalǵan.
— BAQ-ta kámeletke tolmaǵandardyń mas kúıde qoǵamdyq tártipti buzatyny týraly aqparatty jıi kóremiz. Saýda nysandarynyń sany óte kóp bolǵandyqtan, olardyń kámeletke tolmaǵandarǵa alkogol satpaıtynyna eshkim tolyq kepildik bere almaıdy, sebebi olardy tolyqqandy baqylaý fızıkalyq turǵydan múmkin emes. Alkogol kóptegen qylmystyń túpki sebebi bolyp otyr, — dedi Magerram Magerramov Májilistiń búgingi otyrysynda.
Onyń sózinshe, balalar mekemeleri men bilim berý uıymdarynan 100 metr radıýsta alkogol ónimderin satýǵa tyıym salatyn burynǵy normany qaıta engizý qajettiligi týyndady. Sonymen birge, depýtat alkogol ónimderin satatyn saýda oryndarynyń sanyn shekteýdi de usyndy.
Sonymen birge, Halyq partııasy fraktsııasy Úkimetke mynadaı usynystar engizdi:
- alkogol ónimderin mindetti tsıfrlyq tańbalaýǵa jatatyn taýarlar tizbesine engizý;
- alkogol satylatyn naqty saýda núktelerin aıqyndap, odan basqa jerde satýǵa jalpyǵa birdeı tyıym salý;
- saýda nysandarynda alkogol ónimderin bólshek saýdada saǵat 20:00–den keıin satýǵa tyıym salý;
- oıyn-saýyq oryndarynda (kafe, meıramhana) alkogoldi saǵat 22:00–den keıin satýǵa tyıym salý;
- alkogol ónimderin ınternet arqyly satýǵa tyıym salý;
- Mádenıet jáne aqparat, Oqý-aǵartý, Ǵylym jáne joǵary bilim, Densaýlyq saqtaý mınıstrlikterine quqyqbuzýshylyqtyń aldyn alý sýbektileri retinde kámeletke tolmaǵandar men jastar arasynda alkogolızmniń aldyn alý boıynsha tsıfrlyq jáne medıa platformalardy paıdalanyp, biryńǵaı profılaktıkalyq baǵdarlama ázirleý.
Buǵan deıin depýtat Temir Qyryqbaev sábiz eksportyna shekteý engizýge qatysty Úkimetke saýal joldaǵan edi.