Elimizde rekonstrýktsııadan ótken úsh sý nysany iske qosyldy
ASTANA. KAZINFORM — Túrkistan, Almaty jáne Batys Qazaqstan oblystaryndaǵy úsh nysan rekonstrýktsııadan keıin paıdalanýǵa berildi, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
2026 jylǵy maýsymda Sý resýrstary jáne ırrıgatsııa mınıstrligi 2022-2023 jyldary bastalǵan rekonstrýktsııasy aıaqtalǵan úsh sý sharýashylyǵy nysanyn iske qosty.
Túrkistan oblysynyń Ordabasy aýdanynda uzyndyǵy 26,15 shaqyrym bolatyn «Naıman» kanaly paıdalanýǵa berildi. Nysanda kanaldy betondaý jumystary júrgizilip, 75 gıdrotehnıkalyq qurylys salyndy.
Rekonstrýktsııaǵa deıin «Naıman» kanaly Ordabasy aýdanyndaǵy shamamen 2 myń gektar sýarmaly jerdi, sondaı-aq aýdan ortalyǵy men Qajymuqan aýylyndaǵy úı irgesindegi jer telimderin sýmen qamtamasyz etip kelgen. Jobanyń iske asyrylýy sýarmaly alqaptardyń kólemin ulǵaıtýǵa jáne sýdy tasymaldaý kezindegi shyǵyndardy azaıtýǵa múmkindik beredi.
Sonymen qatar D. Qonaev atyndaǵy Úlken Almaty kanalyndaǵy jalpy uzyndyǵy 1,53 shaqyrym bolatyn apatty ýchaskelerdi rekonstrýktsııalaý jumystary aıaqtaldy. Joba aıasynda búlingen ýchaskeler bólshektelip, arna monolıtti temirbetonmen qaptaldy.
Jobany iske asyrý arqyly kanaldyń tehnıkalyq jaı-kúıi jaqsaryp, sý ótkizý qýaty artty jáne sý shyǵyny azaıdy. Bul Almaty oblysyndaǵy 33,3 myń gektar sýarmaly jerdiń sýmen qamtamasyz etilýin jaqsartýǵa múmkindik berdi.
Batys Qazaqstan oblysynda Aqjaıyq aýdanynyń Toǵan aýylynda ornalasqan Kırov sý qoımasyndaǵy gıdrotehnıkalyq qurylystardy rekonstrýktsııalaý jumystary tolyq aıaqtaldy. Bul jumystar sý qoımasynyń senimdiligin arttyrýǵa jáne kóktemgi sý tasqyny kezeńinde turǵyndardyń qaýipsizdigin qamtamasyz etýge baǵyttalǵan.
— Bul jobalar elimizdiń sý qaýipsizdigin qamtamasyz etý jáne sý resýrstaryn tıimdi paıdalaný turǵysynan asa mańyzdy. Kanaldardy rekonstrýktsııalaý sý shyǵynyn azaıtyp, sýarmaly eginshilik pen jalpy aýyl sharýashylyǵynyń damýyna serpin beredi. Al sý qoımalaryndaǵy jumystar nysandardyń beriktigin kúsheıtip, tasqyn jáne erigen qar sýyn qaýipsiz ótkizý men jınaqtaýdy qamtamasyz etý maqsatynda júrgizilip jatyr, — dedi Sý resýrstary jáne ırrıgatsııa mınıstri Nurjan Nurjigitov.
Osydan buryn elde tórt jańa sý qoımasy salynyp, jeti sý qoımasy rekonstrýktsııalanatynyn jazǵanbyz.
