Elimizde referendým kúni 10,4 myń ýchaske jumys isteıdi

ASTANA. KAZINFORM — Qazaqstandyqtar 10402 ýchaskede daýys bere alady. Bul jóninde QR Ortalyq saılaý komıssııasynyń Tóraǵasy Nurlan Ábdirov málimdedi.

Onyń sózinshe, jaýapty mamandar elimizdiń 20 óńirine de baryp, ýchaskelik komıssııalardyń jumysymen jáne referendýmdy uıymdastyrý barysymen tanysqan.

— Daýys berý ýchaskeleriniń materıaldyq-tehnıkalyq daıyndyǵy, ınfraqurylymdyq jáne aqparattyq qamtamasyz etý máseleleri belgilengen talaptarǵa sáıkes uıymdastyrylyp jatyr. Sapar barysynda anyqtalǵan jekelegen tehnıkalyq jáne uıymdastyrýshylyq máseleler sol jerde pysyqtalyp, olardy sheshý boıynsha tıisti sharalar qabyldandy, — dedi N. Ábdirov.

Sonymen birge ol ýchaskelik komıssııa múshelerin oqytý josparǵa saı júzege asyp jatqanyn jáne referendým kúnine deıin aıaqtalatynyn atap ótti.

Aıta keteıik buǵan deıin 54 shet memlekette 71 ýchaske ashylǵanyn jazǵanbyz.