Elimizde pedagogterdi attestattaý qaǵıdalary qaıta qaralady
ASTANA. KAZINFORM — Elordada ortalyq atqarýshy organdarmen aýyl ákimderiniń dıalog-platformasynda suraq-jaýap formatynda ótken talqylaýda oqý-aǵartý mınıstri Juldyz Súleımenova pedagogterdi attestattaý qaǵıdalaryn qaıta qaraý máselesi pysyqtalyp jatqanyn málimdedi.
Oqý-aǵartý mınıstrligi baspasóz qyzmetiniń málimetinshe, kezdesýde aýyl ákimderiniń tarapynan magıstratýra bitirgen pedagogterge biliktilik sanatyn avtomatty taǵaıyndaý jóninde usynys aıtyldy. Oǵan qatysty óz oıymen bólisken elimizdiń bas ustazy attestattaý aıasynda sońǵy ýaqytta qoǵamda úlken pikirtalas týdyrǵan pedagog-zertteýshilerdiń avtorlyq baǵdarlamasyna qatysty da aıtyp ótti.
— Memleket basshysy Qasym-Jomart Kemeluly Toqaev pedagogterdi qorǵaýdy jáne qoldaýdy tapsyrdy. Búginde osy baǵytta «Pedagog mártebesi týraly» zańǵa ózgerister engizilip jatyr. Mınıstrlik pedagogıkalyq qaýymdastyqtyń usynys-pikirlerin eskere otyryp, ustazdardy attestattaý qaǵıdalaryn qaıta qaraý máselesin pysyqtaıdy. Onyń ishinde ustazdardyń avtorlyq baǵdarlama ázirleýine qatysty másele búginde ózekti bolyp otyr. Al magıstratýra bitirgen ustazdarǵa birden biliktilik sanatyn berý jónindegi usynysqa men qarsymyn. Sebebi, orta bilim júıesinde muǵalimniń biliktiligi onyń sabaq berýdegi kásibı sheberliginiń deńgeıine qaraı baǵalanýy tıis, — dep atap ótti Juldyz Súleımenova.
Mınıstr kezdesýde sondaı-aq shaǵyn jınaqty mektepterdi qoldaý sharalary kúsheıtiletinin de aıtty. Aýyldyq eldi mekenderdegi bilimniń sapasyn jaqsartý, oqý úderisiniń tıimdiligin arttyrý úshin sharalar qabyldanady. Bul rette pedagog mamandardy tartý, olarǵa qoldaý kórsetý baǵytynda naqty bastamalar júzege asyrylady.
Aıta keteıik, búginde mınıstrlikke pedagogterden attestatsııa qaǵıdattaryn qaıta qaraý jóninde kóptegen usynystar kelip túsip jatyr.
Jalpy elimizdiń bilim berý júıesinde 600 myńǵa jýyq pedagog qyzmet etedi.
Budan buryn mınıstr mektepterde pánderdi biriktirip oqytý jónindegi usynysqa qatysty óz pikirin bildirgen edi.