Elimizde «Paryz-2025» baıqaýy bastaldy
ASTANA. KAZINFORM — Eńbek jáne halyqty áleýmettik qorǵaý mınıstrligi 2025 jyly bıznestiń áleýmettik jaýapkershiligi jónindegi «Paryz» baıqaýynyń bastalǵanyn habarlaıdy.

Baıqaý halyqtyń ál-aýqatyn odan ári jaqsartý úshin qoǵam aldyndaǵy ózderiniń korporatıvtik áleýmettik jaýapkershiligin qalyptastyrýǵa jáne arttyrýǵa baǵyttalǵan.
Baıqaý óńirlik jáne respýblıkalyq eki kezeńnen turady. Shaǵyn, orta jáne iri kásipkerlik sýbektileri 4 atalym «Úzdik áleýmettik jaýapty kásiporyn», «Eńbekti qorǵaý salasyndaǵy úzdik kásiporyn», «Úzdik ujymdyq shart», «Ekologııaǵa qosqan úlesi úshin» boıynsha ózara úzdikti anyqtaıdy. Sondaı-aq baıqaý aıasynda «Jyldyń úzdik áleýmettik jobasy» arnaıy syılyǵy tabystalady.
Baıqaýǵa qatysý tegin. Úmitkerler óz materıaldaryn qaǵaz túrinde jáne elektrondy formatta oblystardyń, respýblıkalyq mańyzy bar qalalardyń jergilikti atqarýshy organdaryna joldaıdy.
— Ótkiziletin is-sharalardyń mańyzdylyǵyn eskere otyryp, QR Eńbek jáne halyqty áleýmettik qorǵaý mınıstrligi elimizdiń barlyq kásipkerlerin «Paryz» baıqaýyna belsendi qatysýǵa shaqyrady. Baıqaýǵa qatysty ózge aqparatty bilý úshin oblystardyń, Astana, Almaty jáne Shymkent qalalarynyń jumyspen qamtýdy úılestirý jáne áleýmettik baǵdarlamalar basqarmasyna nemese QR EHÁQM Memlekettik eńbek ınspektsııasy komıtetiniń óńirlik departamentterine habarlasýǵa bolady, — delingen mınıstrlik habarlamasynda.
Budan buryn Eńbekmıni aılyǵy 20%-ǵa ósetin mamandardy atady.