Elimizde otyn-energetıka kesheninde jumys oryndary qanshalyqty artady
ASTANA. KAZINFORM — Energetıka vıtse-mınıstri Qudaıbergen Arymbek bıyl otyn-energetıka kesheninde qosymsha ashylatyn jumys oryndaryna qatysty túsinik berdi.
— Qazir otyn-energetıka kesheninde 1671 kásiporyn bar, onda túrli kásip boıynsha 303 myńnan astam jumysker jumyspen qamtylǵan. Bıyl otyn-energetıka kesheni salalarynda 14 myńnan astam jumys ornyn qurý josparlanǵan. Munaı-gaz hımııasynda jumys istep turǵan 6 kásiporynda 2 myńǵa jýyq adam eńbek etip jatyr. Osy jyly qosymsha 945 jumys ornyn qurý josparlanyp otyr. Jańartylatyn energııa kózderi (JEK) salasyndaǵy 156 kásiporynda shamamen 2 myń adam jumyspen qamtylǵan, al bıyl qosymsha shamamen 3 myń jumys ornyn qurý josparlanyp otyr, — dedi Qudaıbergen Arymbek.
Onyń aıtýynsha, munaı-gaz salasyndaǵy 1500 kásiporynda shamamen 200 myń adam jumyspen qamtylǵan, osy jyly 6 myńnan astam jańa jumys ornyna ornalasady. Budan bólek, elektr energetıkasyndaǵy 220 kásiporynda shamamen 70 myń adam jumyspen qamtylǵan, al bıyl 3 myńnan astam jumys orny ashylady.
— Investıtsııalyq jobalardy iske asyrý aıasynda otyn-energetıka kesheninde jańa jumys oryndaryn kezeń-kezeńimen qurý kózdelgen. Osylaısha, 2029 jyldyń sońyna deıin 70 myńǵa jýyq jumys ornyn qura otyryp, 200-den astam jobany iske asyrý josparlanyp otyr, — dedi vıtse-mınıstr.
Budan buryn habarlanǵandaı, sýbsıdııalanatyn jumys oryndaryn iske asyrý tártibine ózgeris engizilip jatyr.