Elimizde ótetin «Bolashaqtyń oıyndary» 2026 jylǵa aýystyrylady
ASTANA. KAZINFORM - Memleket basshysy Qasym-Jomart Toqaev elimizdegi sý tasqyny saldaryn joıý jáne zardap shekken azamattarǵa kómek kórsetý úshin qarjyny únemdeý maqsatynda elimizde ótetin ımıdjdik jáne basqa da iri is-sharalardy ótkizbeýdi jáne keıinge shegerýdi tapsyrdy.
QR Týrızm jáne Sport mınıstrliginiń baspasóz qyzmeti atap ótkendeı, bıyl kúzde uıymdastyrylatyn 5-shi Dúnıejúzilik kóshpendiler oıyndaryn ótkizý shyǵyndaryn ońtaılandyrý, «Bolashaqtyń oıyndary» halyqaralyq mýltısport týrnırin uıymdastyrý jáne ótkizý boıynsha daıyndyq jumystaryn 2025 jyldan 2026 jylǵa aýystyrý týraly sheshim qabyldandy.
Esterińizge sala keteıik, bıylǵy aqpanda Prezıdent Tatarstannyń Qazan qalasynda ótken «Bolashaqtyń oıyndary» básekesiniń ashylý saltanatyna qatysyp, kelesi jylǵy mýltısport týrnıri Qazaqstanda ótetinin málimdegen edi. Oıyndar tsıfrlyq jáne klassıkalyq sportty biriktiretin 21 ınnovatsııalyq fıdjıtal baǵdarlama boıynsha ótti. Qazaqstannyń oıynshylary men komandalary sporttyń 13 túri boıynsha saıysqa tústi. Jalpy bul týrnırde elimizdiń 48 ókili baq synady.
