Elimizde otandyq tuqym sharýashylyǵyn damytý maqsatynda «Qazaq Tuqym» konsortsıýmy quryldy
ASTANA. KAZINFORM - UAǴBBO transformatsııalaý aıasynda «Qazaq Tuqym» ǵylymı-óndiristik konsortsıýmy quryldy. «Qazaq Tuqym» ǵylymı-óndiristik selektsııalyq-tuqym ósirý konsortsıýmy fermerlerdi joǵary sapaly otandyq tuqymdar men sorttarmen qamtamasyz ete otyryp, Qazaqstannyń ósimdik sharýashylyǵyna jańa serpilis ákelmek. Bul týraly Aýyl sharýashylyǵy mınıstrligi málimdedi.
Konsortsıým quramyna eldiń soltústik óńirlerinde ornalasqan Ulttyq agrarlyq ǵylymı-bilim berý ortalyǵyna enshiles 12 uıym kirdi.
«Qazaq Tuqym» konsortsıýmyn qurý arqyly aldaǵy ýaqytta ǵalymdar, tuqym ósirýshiler men sellektsıonerler arasynda seriktestik nyǵaıa túspek. Sonyń arqasynda ǵalymdardan aýyl sharýashylyǵy salasyna usynylatyn otandyq ónimniń sapasy jaqsarady. Konsortsıým aıasynda demonstratsııalyq polıgondar quryp, fermerlerge jańa sorttardyń múmkindigin kórsetý josparlanyp otyr. Osylaısha elıtalyq tuqymdardyń kólemi ulǵaımaq.
Ǵalymdardyń aıtýynsha, osyndaı aýqymdy jumystardyń arqasynda 2030 jylǵa deıin sheteldik ımporttan múmkindiginshe arylyp, otandyq tuqymdy qoldaný 80%-ǵa jetýi múmkin. Aldaǵy ýaqytta «Qazaq Tuqym» konsortsıýmy arqyly elimizdiń tuqym ósirý salasynda júıeli jumys ornatyp, otandyq óndirýshilerge qoldaý kórsetý kózdeledi. Osynyń arqasynda azyq-túlik qaýipsizdigi men táýelsizdigimiz de nyǵaıa túspek.
