Elimizde Ortalyq Azııa elderiniń qatysýymen áskerı jattyǵý ótedi
ASTANA. KAZINFORM - Bıyl elimizde Ázerbaıjan men Ortalyq Azııa elderi: Qyrǵyzstan, Tájikstan jáne Ózbekstannyń qatysýymen jaýyngerlik daıyndyq sharalary aıasynda aýqymdy áskerı oqý-jattyǵýlar ótedi. Bul týraly Qorǵanys mınıstri general-polkovnık Rýslan Jaqsylyqovtyń basshylyǵymen ótken 2024 oqý jylynda QR Qarýly kúshterin daıarlaý men damytýdyń negizgi sharalary boıynsha ótken keńeste aıtyldy.
Mınıstr negizgi kúsh jaýyngerlik daıarlyqtyń sapasyna jáne áskerlerdiń jaýyngerlik ázirligin arttyrýǵa baǵyttalatynyn atap ótti. Qorǵanys vedomstvosynyń basshysy jeke quramnyń memlekettiń egemendigi men aýmaqtyq tutastyǵyn qorǵaý jónindegi jaýyngerlik mindetterdi oryndaýǵa daıyndyǵy osy faktorlarǵa baılanysty ekenin aıtty.
«Bıyl el aýmaǵynda bes memlekettiń qatysýymen aýqymdy oqý-jattyǵýlar ótedi. Ol joǵary deńgeıde uıymdastyrylýy kerek. Jaýapkershilik aımaǵynda qaýipsizdikti qamtamasyz etý mindetin oryndaý maqsatynda baýyrlas halyqtar men qarýly kúshter arasyndaǵy dostyq qarym-qatynasty saqtaý biz úshin óte mańyzdy», – dedi Qazaqstan Qorǵanys mınıstri Rýslan Jaqsylyqov.
Qorǵanys mınıstriniń birinshi orynbasary – Qarýly kúshter Bas shtabynyń bastyǵy general-leıtenant Marat Qusaıynovtyń atýynsha, 2024 jylǵa 160-tan asa jedel jáne 70 myńnan astam jaýyngerlik daıarlyq jónindegi is-sharalar josparlanǵan. Bas shtab bastyǵy olardyń ishindegi eń mańyzdysy Áskerı-teńiz kúshteriniń, Áskerı-áýe kúshteriniń, «Batys» óńirlik qolbasshylyǵyndaǵy arnaıy operatsııalar kúshteriniń, odan ózge Ázerbaıjan, Qyrǵyzstan, Tájikstan jáne Ózbekstan áskerı kontıngentteriniń qatysýymen ótetin «Birlestik» oqý-jattyǵýy ekenin atap ótti.
«2024 jyly Qazaqstanda barlyǵy 33 jarys ótedi. Sonymen birge áskerı sportshylar 17 halyqaralyq jarysta da baǵyn synaıdy. Bıyl qazaqstandyq áskerı qyzmetshilerdiń 35 halyqaralyq taktıkalyq oqý-jattyǵýǵa qatysýy josparlanyp otyr, olardyń altaýy bizde ótedi», – dedi Qorǵanys mınıstriniń birinshi orynbasary.
