Elimizde orta bilim sapasyn táýelsiz baǵalaıtyn ortalyq qurylýy múmkin
ASTANA. KAZINFORM – Elimizde orta bilim sapasyn táýelsiz baǵalaıtyn ulttyq zertteý ortalyǵyn qurý máselesi pysyqtalady. Bul týraly Májilis depýtattarynyń saýalyna Premer-mınıstrdiń orynbasary - Mádenıet jáne aqparat mınıstri Aıda Balaevanyń jaýabynda aıtylǵan.
– Bilim sapasyn baǵalaýdyń ádil kórsetkishter júıesin engizýge, bilim sapasyn táýelsiz baǵalaıtyn ulttyq zertteý ınstıtýtyn qurýǵa qatysty Jyl saıyn 9-synypty aıaqtaǵannan keıin oqýshylarǵa aralyq attestattaý, al 11-synypty aıaqtaǵannan keıin qorytyndy attestattaý júrgiziledi. Bilim berý uıymdaryn memlekettik attestattaý sheńberindegi keshendi testileý bilim sapasynyń bilim berýdiń memlekettik jalpyǵa mindetti standarttarynyń talaptaryna sáıkestigin baǵalaıdy. Bilim alýshylardyń bilim jetistikterine monıtorıng jyl saıyn mektepterde úsh baǵyt boıynsha ótkiziledi: oqý saýattylyǵy, matematıkalyq saýattylyq jáne jaratylystaný-ǵylymı saýattylyq. 2024 jyly bilim alýshylardyń bilim jetistikterine monıtorıng ulttyq qural retinde halyqaralyq akkredıtatsııa sertıfıkatyn aldy, - dedi Úkimet basshysynyń orynbasary.
Onyń aıtýynsha, bilim berý sapasy boıynsha obektıvti nátıjeler alý maqsatynda qazaqstandyq oqýshylar halyqaralyq salystyrmaly zertteýlerge (PISA, PISA for Schools, TIMSS, ICILS, PIRLS) qatysady. Bul zertteýler oqýshylardyń oqý jetistikteri men fýnktsıonaldyq quzyrettilekteri týraly, atap aıtqanda oqý, matematıka, jaratylystaný ǵylymdary jáne aqparattyq kommýnıkatsııalyq tehnologııalar salalaryndaǵy deńgeıin anyqtaýǵa múmkindik beredi.
– Mınıstrlikpen (Oqý-aǵartý mınıstrligi) bilim berý sapasyn baǵalaýdyń ulttyq júıesiniń quramdas bólikteri bolyp tabylatyn ishki jáne syrtqy baǵalaýdy jetildirý baǵytynda turaqty negizde jumys júrgizilýde. Búgingi kúni respýblıka boıynsha bilim sapasyn baǵalaý jáne bilim berý júıesine taldamalyq súıemeldeý fýnktsııalaryn «Ahmet Baıtursynuly atyndaǵy «Taldaý» ulttyq zertteýler jáne bilimdi baǵalaý ortalyǵy» aktsıonerlik qoǵamy (budan ári – ortalyq) júzege asyrady. Atalǵan ortalyq qazaqstandyq jáne sheteldik joǵary oqý oryndarymen, Ekonomıkalyq yntymaqtastyq jáne damý uıymynyń, IEA, ıÝNESKO, ıÝNISEF, Dúnıejúzilik bank, Eýropalyq bilim berý qory sııaqty jetekshi halyqaralyq uıymdarmen turaqty seriktestik ornatyp, bilim berý salasyndaǵy ulttyq taldaý ortalyǵy retinde tanylǵan. Táýelsiz ulttyq zertteý ınstıtýtyn qurý jónindegi usynys belgilengen tártippen zerdelenip, qosymsha pysyqtalatyn bolady, - dedi Aıda Balaeva.
Buǵan deıin Qazaq Digital Mektebi jáne pedagog mamandarǵa arnalǵan JI-men qamtylǵan Ulttyq bilim berý platformasy iske qosylatynyn jazǵan edik.
