Elimizde órt sóndirý kóligine júrgizýshiler jetispeıdi

ASTANA. KAZINFORM – Tótenshe jaǵdaı mınıstrligi órtke qarsy qurylymda qyzmetkerlerdiń tapshylyǵy bar ekenin jarııalady.

«Qoldanystaǵy shtattyq normatıvterge qaraǵanda, órtke qarsy qyzmet qyzmetkerleri boıynsha normatıv pen naqty sany arasyndaǵy aıyrmashylyq 44% qurap otyr. Barlyq qyzmetker qajet kıimmen (shlem, ýly gazdan qorǵaıtyn jabdyq, syrt kıim, aıaq kıim, ratsııa, alǵashqy medıtsınalyq kómek kórsetý qobdıshasy jáne t.b.) qamtamasyz etilgen. Órt sóndirý kóligine júrgizýshiler jetispeıdi», - delingen mınıstrliktiń Kazinform agenttigine bergen jaýabynda.

Budan buryn habarlanǵandaı, bıyldyń ózinde 150-ge jýyq tabıǵı órt tirkeldi. 

«Osy jyly jaz ystyq bolýy múmkin, ıaǵnı órttiń shyǵý qaýpi joǵary. Qazirdiń ózinde elimiz boıynsha 27 orman órti jáne 122 dala órti tirkeldi. Olardyń kóbi mınıstrlik kúshteriniń, sonyń ishinde avıatsııanyń qatysýymen aýyzdyqtaldy», - dep atalyp ótken mınıstrlik habarlamasynda.

Jyl saıyn órt qaýipti kezeńde 1 myńǵa jýyq orman órti, sondaı-aq adamdardyń ómirine, olardyń múlkine jáne qorshaǵan ortaǵa qaýip tóndiretin 4 myńǵa tarta dala órti tirkeledi.