Elimizde Orman qoryn kúzetý jáne qorǵaý qyzmeti quryldy

ASTANA. KAZINFORM –  Memleket basshysy Qasym-Jomart Toqaevtyń tapsyrmasyn oryndaý aıasynda QR Úkimeti tabıǵı órtke qarsy is-qımyl júıesin nyǵaıtý jumystaryn jalǵastyryp jatyr. QR Premer-Mınıstri Oljas Bektenov Orman qoryn kúzetý jáne qorǵaý qyzmetin qurý týraly qaýlyǵa qol qoıdy, dep habarlady Úkimettiń baspasóz qyzmeti.

Ekologııa jáne tabıǵı resýrstar mınıstrligi janyndaǵyjańa Respýblıkalyq azamattyq qorǵaý qyzmeti TJ kezinde, onyń ishinde orman órtterin sóndirý barysynda orman sharýashylyǵy mekemeleriniń tıimdiligin arttyrýǵa múmkindik beredi. Orman órtterine qarsy is-qımyl ormandardy kóbeıtýge jáne aǵashtardy kesýge ǵylymı tásildi, sondaı-aq keshendi aldyn alý sharalaryn qabyldaý men tıisti quzyretterdi damytýdy qajet etedi. Bólek qyzmet qurý qajettiligi osyndaı talaptardan týyndap otyr. Orman qoryn kúzetý jáne qorǵaý qyzmetiniń qurylýy memlekettik organdardyń alapat orman órtterine qarsy kúres sharalaryn úılestirýin jaqsartýǵa, tıisti mekemelerdi tehnıkamen jáne qural-jabdyqtarmen qamtamasyz etýdi arttyrýǵa, sondaı-aq tabıǵı órtterdiń aldyn alý jáne sóndirý úshin bilikti kadrlar quramyn jasaqtaýǵa múmkindik beredi dep josparlanǵan.

Aıta ketý kerek, qazirgi ýaqytta Qazaqstanda 15 respýblıkalyq azamattyq qorǵaý qyzmeti bar. Olar elimizdegi tirshilikti qamtamasyz etetin ınstıtýttardyń turaqty jumys isteýin qamtamasyz etýge arnalǵan. Olardyń qataryna Órt sóndirý qyzmeti, Medıtsınalyq qyzmet, Hımııalyq qorǵaý qyzmeti, Injenerlik qyzmet, Radıatsııadan qorǵaý qyzmeti, Ulttyq gıdrometeorologııalyq qyzmet jáne t. b. jatady.