Elimizde organıkalyq jáne ekoónimder úshin jańa ereje engizilmek
ASTANA. KAZINFORM — Jańa Salyq kodeksin túsindirýge arnalǵan semınar barysynda memlekettik mekemelerge sút ónimderin jetkizetin aýyl sharýashylyǵy taýarlaryn óndirýshiler kelisimsharttardy uzartý máselesin kóterdi.
Olardy kelisimsharttardyń 2025 jylǵy baǵalarmen jasalǵany alańdatyp otyr. Óıtkeni, QQS mólsherlemesiniń ósýine baılanysty óndirýshiler ónimniń qunyn kóterýge májbúr bolady. Sonymen qatar memleket bul protsesti baqylaı ala ma, memlekettik mekemeler jańa kelisimsharttardy qalaı jasaıdy jáne 2025 jyldan 2026 jylǵa memlekettik satyp alýlar qalaı ótedi degen suraqtar da qyzyqtyrdy.
Premer-mınıstrdiń orynbasary — Ulttyq ekonomıka mınıstri Serik Jumanǵarın memlekettiń baǵa saıasaty tek áleýmettik mańyzy bar azyq-túlik ónimderine ǵana qatysty ekenin aıtty.
— Bizde sút ónimderine baǵa belgileý saıasaty joq. Tek áleýmettik mańyzy bar azyq-túlik ónimderine qatysty ǵana saýda ústemeaqysy saıasaty bar, ol ár kezeńde 15 paıyzdan aspaýy tıis, — dedi Serik Jumanǵarıın.
Sonymen qatar ol Saýda jáne ıntegratsııa mınıstrliginiń otandyq ónimderdi ornalastyrýǵa qatysty talaptary bar ekenin atap ótti.
— Bilýimshe bul zańdy norma — saýda jelilerine otandyq óndirýshilerdiń ónimderin ornalastyrýǵa qoıylatyn talap. Arnaıy sórelerde jáne keminde 30 paıyz bolýy tıis, — dedi ol.
Munan bólek, mınıstr qoldanystaǵy «Qazaqstanda jasalǵan» saıasatyn eske salyp, jańa bastamalar ázirlenip jatqanyn habarlady.
— Qazir biz ekologııalyq — organıkalyq, organıkalyq ónimdermen baılanysty birqatar jańa ereje ázirlep jatyrmyz, — dedi Serik Jumanǵarın.
Onyń aıtýynsha, áleýmettik mańyzy bar taýarlardan basqa ónimderge baǵa shekteýleri joq. Kúrish, ósimdik maıy jáne jumyrtqa boıynsha memorandýmdar jasalǵan.
— Óndirýshiler áleýmettik mańyzy bar taýarlardy qospaǵanda ózge ónimderge qandaı baǵa belgileýge májbúrlenbeıdi. Eger sizderde kelisimshart jasasýda qandaı da bir problema bolsa, onda biz kómektesemiz. Saýda mınıstrligine, Saýda komıtetine júginińizder. Eger sizdermen kelisimshart jasasýdan bas tartsa nemese qandaı da bir kiriptarlyq sharttar usynsa, onda biz bul máseleni sheshemiz, — dedi vıtse-premer.
Aıta ketelik elde kimder QQS-tan bosatylatyny týraly jazǵan edik.