Elimizde onlaın tólemniń úlesi 90 paıyz – Ulttyq bank tóraǵasy

ALMATY. KAZINFORM – Keıingi bes jylda elimizde qolma-qol aqshasyz tranzaktsııalar kólemi 10 ese artqan.

Almatyda ótip jatqan Central Asia Fintech Summit forýmynda Ulttyq bank tóraǵasy Tımýr Súleımenov qarjy sektory ekonomıkanyń basty qozǵaýshy kúshteriniń biri ekenin atap ótti. Aıtýynsha, keıingi bes jylda halyq qolma-qol aqshany qoldanýdy azaıtqan. Qazir Qazaqstandaǵy tólemniń 90 paıyzy onlaın formatta júzege asyrylady.

– Munda memlekettiń, atap aıtqanda Ulttyq banktiń jáne Ulttyq tólem korporatsııasynyń úlesi zor ekenin túsiný mańyzdy. Tólem aınalymynyń shamamen 90 paıyzy osy korporatsııanyń ınfraqurylymy arqyly ótedi. Barlyq operatsııa naqty, kidirissiz júrgiziledi, senimdilik deńgeıi – 99,99 paıyz. Toǵyz aıdyń ishinde jalpy tranzaktsııalar kólemi 1 kvadrıllıon teńge mejesinen asty. Árıne, jyl sońyna deıin bul kórsetkish odan da joǵary bolady, - dedi ol.

Tımýr Súleımenovtiń aıtýynsha, búginde klıentti onlaın sáıkestendirýden bastap bank shotyn ashý, nesıe rásimdeý, tólemder jasaý jáne memlekettik qyzmetter alý syndy qarjylyq qyzmetter tsıfrlyq formatta qoljetimdi. Ulttyq bank bazasynda aı saıyn shamamen 4 mıllıon ótinishti óńdeıtin bıometrııalyq sáıkestendirý servısi jumys istep tur. 

Alaıda tsıfrlyq tehnologııalardyń damýymen qatar kıberqaýiptiń de aýqymy keńeıip keledi. Ulttyq bank basshysy azamattardy kıberalaıaqtyqtan qorǵaý úshin júıeli sharalar qabyldap jatqanyn aıtty. 

– Ótken jyldyń shildesinde Ulttyq bank bazasynda antıfrod ortalyǵy iske qosyldy. Ol Ulttyq bankti, Qarjy naryǵyn retteý jáne damytý agenttigin, bankter men iri mıkroqarjylyq uıymdarynyń antıfrod-júıelerin, quqyq qorǵaý organdaryn jáne telekom-operatorlardy biriktiredi. Birlesken jumystyń arqasynda 3 mıllıard teńgeden astam qarjyny urlaýǵa jol berilmedi, kóptegen kıberqylmystyń joly kesildi. «Qara tizim» jasalyp, olardyń negizinde ІІM myńdaǵan qylmystyq is qozǵady. Bul – durys baǵyt jáne osy jumysty ary qaraı keńeıtemiz, - dedi Tımýr Súleımenov.

Sonymen qatar ol Ulttyq bank pen Qarjy naryǵyn retteý jáne damytý agenttigi aldaǵy 5 jylǵa arnalǵan qarjy retteýshilerin tsıfrlandyrý strategııasyn bekitkenin habarlady. Bul qujat eki organ qolǵa alǵan barlyq tsıfrlyq bastamalardy biriktirip, Qazaqstandaǵy tsıfrlyq qarjynyń odan ári damýynyń negizin qalamaq.

Eske salaıyq, buǵan deıin antıfrod ortalyǵynyń jumys erejeleri ázirlendi.