Elimizde ónerkásiptik menshikke ótinim berý artyp keledi
Osy jyldyń 11 aıynda ónerkásiptik menshikke 11 myńnan astam ótinim berildi. Bul týraly Ádilet mınıstrliginiń resmı ókili Talǵat Ýálı aıtty, dep habarlaıdy Kazinform.
«El azamattarynyń quqyqtyq saýatyn arttyrýdyń, vebınarlar jáne bıznes, ǵylym, kreatıvti ındýstrııa ókilderin únemi oqytýdyń arqasynda, sondaı-aq shetel azamattary belsendiliginiń artýyna baılanysty 2023 jyly ónerkásiptik menshikke ótinim berý edáýir ósti. Osylaısha, 2023 jyldyń qorytyndysy boıynsha berilgen quqyq qorǵaý qujattarynyń sany 11 000-nan asty. Bul ótken jylmen salystyrǵanda 11 paıyzǵa artyq). Atap aıtqanda, taýar belgilerin, paıdaly modelderdi, selektsııalyq jetistikterdi, taýarlar shyǵarylǵan jerlerdiń ataýlaryn jáne ıntegraldy mıkroshemalardy tirkeýge ótinim bergen azamattardyń sany artyp otyr», - dedi Talǵat Ýálı.
Onyń naqtylaýynsha, taýar tańbalaryn tirkeý boıynsha – 10 293, paıdaly modelder boıynsha – 897, selektsııalyq jetistikter boıynsha – 72, taýarlar shyǵarylǵan jerlerdiń ataýy boıynsha – 24, ıntegraldy mıkroshemalar boıynsha – 3, ónertabystar boıynsha – 443, ónerkásiptik úlgiler boıynsha 112 ótinim tirkeldi.
«2022 jylǵy 20 maýsymdaǵy Qazaqstan Respýblıkasynda zańmen «geografııalyq kórsetkish» zııatkerlik menshiktiń jańa obektisi bolyp engizilgen bolatyn. Avtorlyq quqyqpen qorǵalatyn obektiler memlekettik tizilimine 9 389 málimet engizildi. Bul 2022 jylmen salystyrǵanda 17,6 paıyzǵa artyq. 2023 jyly zııatkerlik menshik quqyǵyn qorǵaý boıynsha berilgen elektrondyq ótinimderdiń úlesi 98,5 paıyz boldy», - dedi resmı ókil.
