Jyl basynan beri 133 jumysshy óndiris ornynda qaza tapqan
ASTANA. KAZINFORM — QR Eńbek jáne halyqty áleýmettik qorǵaý mınıstrliginiń Memlekettik eńbek ınspektsııasy komıtetiniń málimetine sáıkes 2025 jylǵy 1 qazandaǵy jaǵdaı boıynsha óndiristegi jazataıym oqıǵalardan 934 jumysker zardap shegip, onyń 133-i qaza tapty. Bul rette bıylǵy 9 aıdyń qorytyndysy boıynsha óndiristik jaraqattaný 2024 jyldyń ekinshi jartyjyldyǵymen salystyrǵanda 3,4%-ǵa tómendedi. Bul týraly vedomstvonyń baspasóz qyzmeti málim etti.
Aǵymdaǵy jyly 9 aıda óndiristik jaraqattaný koeffıtsıenti (1000 jumyskerge shaqqandaǵy jazataıym oqıǵalardyń jıiligi) 0,13 qurady.
Respýblıkanyń ónidiristik aımaqtarynda jaraqat alýshylardyń joǵary kórsetkishi saqtalyp otyr. Máselen, Qaraǵandy oblysynda — 103 adam, ShQO-da — 89 adam, Pavlodar oblysynda — 68 adam, Aqtóbe oblysynda — 64 adam, Atyraý oblysynda — 48 adam zardap shekken. Sondaı-aq, Almaty qalasynda 51 adam zardap shekti.
Ekonomıkanyń salalary boıynsha eń kóp zardap shekkender taý-ken metallýrgııa kesheniniń ónerkásipterinde — 17,4% jáne qurylys salasynda — 10,2%.
— Jazataıym oqıǵalardyń oryn alýynyń negizgi sebepteri: óndiristegi jumystyń tıisti deńgeıde uıymdastyrylmaýy (34,2%); jábirlenýshiniń óziniń óreskel abaısyzdyǵy (33,6%); eńbek qaýipsizdigi jáne eńbekti qorǵaý erejelerin buzý (8,5%); jol qozǵalysy erejelerin buzý (7,8%), — delingen habarlamada.
Vedomstvonyń dereginshe, eńbekti qorǵaý faktileriniń buzylýshylyqtary boıynsha quqyq qorǵaý organdaryna jazataıym oqıǵalardy tergeýdiń 730 materıaly jiberildi, sonyń negizinde 211 qylmystyq is qozǵalǵan.
Qaýipsiz eńbek jaǵdaıyn jasaý men óndiristik jaraqattanýdy azaıtý QR Úkimeti men Eńbek jáne halyqty áleýmettik qorǵaý mınıstrliginiń negizgi mindetteriniń biri bolyp tabylady.
Sońǵy bes jyldyń ishinde memlekettik organdar men jumys berýshilerdiń eńbekti qorǵaý salasy boıynsha qabyldanǵan keshendi sharalardyń nátıjesinde óndiristik jaraqattaný deńgeıi 6,7%-ǵa túsken.
Profılaktıka men buzýshylyqty aldyn alý maqsatynda elimizdiń 3262 kásiporny qaýipsizdik pen eńbekti qorǵaý standarttaryn engizdi.
2019 jyldan bastap Mınıstrlik tarapynan «Nóldik jaraqat — Vision Zero» tujyrymdamasyn jetildirý bolıynsha belsendi jumys atqarylýda. Oǵan búginde 610 kásiporyn qosyldy.
Qurylys obektilerinde bas merdigerdiń obektidegi eńbek qaýipsizdigi máseleleri boıynsha barlyq qosalqy merdigerlerge jaýapkershiligi men baqylaýyn kózdeıtin baqylaýdyń tikeleı modelin engizý boıynsha jumys jalǵasýda. Bul baqylaý modelin respýblıkanyń 318 kásiporny engizdi.
Sonymen qatar, «Onlaın eńbek konsýltanty» elektrondy servısi iske qosyldy. Ol jumysker men jumys berýshiniń arasynda qashyqtyqtan ózara árekettesýdi qamtamasyz etý úshin eńbek zańnamasynyń saqtalýynyń tıimdiligin arttyrýǵa múmkindik beredi. Servıs jumys berýshiniń eńbekti qorǵaý talaptarynyń saqtalýyn ózindik tekserýden ótýin qarastyrady. Servıs iske qosylǵaly beri 50 125 jumys berýshi ony paıdalandy.
Qazaqstan Respýblıkasynyń 2024-2030 jyldarǵa arnalǵan qaýipsiz eńbek tujyrymdamasy iske asyrylýda, ol 4 negizgi baǵytty kózdeıdi. Bul táýekelge baǵdarlanǵan tásil negizinde eńbekti qorǵaýdyń ulttyq júıesin jańǵyrtý, jumys oryndarynda táýekeldi tómendetý jónindegi sharalardy ekonomıkalyq yntalandyrý, kásibı quzyrettilikter men ǵylymı áleýetti damytý, sondaı-aq eńbekti qorǵaý salasyndaǵy baqylaý men monıtorıngtiń tıimdiligin arttyrý. Tujyrymdamany iske asyrý óndiristik jaraqattaný men kásiptik syrqattanýshylyq deńgeıin tómendetýge yqpal etetin bolady.
Al óndiristik jaraqat alǵan adamǵa ótemaqy qalaı esepteletinin myna siltemeden oqyńyz.