Elimizde óńdeýshi ónerkásiptiń óndiris kólemi 25 trln teńgege jetti

ASTANA. KAZINFORM — Bıyl elimizde óńdeýshi ónerkásip óndirisiniń kólemi 2021 jylmen salystyrǵanda 7,9 trln teńgege artty.

— ⁠Eldiń ónerkásiptik saıasaty óńdeýshi ónerkásipti turaqty damytýǵa baǵyttalǵan. Bul — básekege qabiletti, joǵary tehnologııalyq jáne eksportqa baǵyttalǵan ónim óndirý kólemin arttyrý, sondaı-aq shıkizat modelinen bas tartý arqyly júzege asyrylady. Memlekettik qoldaý sharalary, eń aldymen, ekonomıkanyń uzaqmerzimdi básekege qabilettiligin aıqyndaıtyn, negizinen orta jáne joǵary qaıta óńdeý ónimderin óndirýge baǵyttalǵan ındýstrııalyq-ınnovatsııalyq qyzmet sýbektilerine kórsetiledi, — delingen Premer-mınıstr Oljas Bektenovtiń depýtattyq saýalǵa bergen jaýabynda.

Úkimet basshysy keltirgen málimetke saı, óńdeý deńgeıi mınıstr buıryǵymen bekitilgen baǵalaý ádistemesine sáıkes aıqyndalady. Atalǵan ádistemede tehnologııalyq kúrdelilik, eksporttyq áleýet jáne ishki suranys sııaqty ólshemsharttar eskerilgen.

— Qoldanylǵan sharalardyń nátıjesinde óńdeýshi ónerkásip óndirisiniń kólemi 2021 jylmen salystyrǵanda 7,9 trln teńgege ósti. 2024 jyly salanyń naqty kólem ındeksi 106,9%-dy (jospar — 104,8%) qurap, nomınaldy kólemi 25,0 trln teńgege jetti. Negizgi kapıtalǵa salynǵan ınvestıtsııa kólemi 2 074,5 mlrd teńgeni qurady (2021 jylmen salystyrǵanda +34,6%). Óńdelgen ónim eksporty 28,8 mlrd AQSh dollaryn qurap, 2021 jylmen salystyrǵanda 45,1%-ǵa artty. Statıstıka derekterine sáıkes, 2025 jylǵy qańtar–mamyr aılarynda Qazaqstandaǵy ónerkásip óndirisiniń ındeksi 106,0%-dy qurady. Osy kezeńde jalpy somasy 2 387,8 mlrd teńgege ónerkásip ónimi óndirildi, — deıdi Premer-mınıstr.

Eske sala ketsek, jýyrda ótken Úkimet otyrysynda Oljas Bektenov Ónerkásip jáne qurylys mınıstri Ersaıyn Naǵaspaevqa metallýrgııa salasyna nazar aýdarýyn eskertip, salanyń damý qarqyny máz emes dep syn aıtqan edi.