Elimizde ómir súrý uzaqtyǵy tarıhı eń joǵary deńgeıge jetti
ASTANA. KAZINFORM — Qazaqstanda halyq densaýlyǵyna qatysty negizgi kórsetkishter jaqsaryp keledi. 2025 jyly eldegi kútiletin ómir súrý uzaqtyǵy 75,97 jasqa jetip, táýelsizdik jyldaryndaǵy eń joǵary kórsetkish tirkeldi.
Náreste ólimi de tómendegen. Ótken jyly bul kórsetkish 15%-ǵa azaıyp, tiri týǵan ár myń balaǵa shaqqanda 5,85 jaǵdaıǵa deıin tústi. Bul — Qazaqstan tarıhyndaǵy eń tómen kórsetkish.
Halyqaralyq baǵalaýlarǵa sáıkes, Qazaqstan Ortalyq Azııa elderi arasynda kútiletin ómir súrý uzaqtyǵy boıynsha birinshi orynda tur. Náreste ólimi boıynsha da óńirdegi eń tómen kórsetkish Qazaqstanda. TMD elderi arasynda respýblıka úshinshi orynda.
Qazaqstan Ortalyq Azııada Dúnıejúzilik densaýlyq saqtaý uıymynyń (DDU) juqpaly emes aýrýlardan bolatyn mezgilsiz ólim-jitimdi 25%-ǵa qysqartý jónindegi nysanaly kórsetkishine alǵash bolyp qol jetkizgen. DDU baǵalaýynsha, osy baǵytta usynylǵan sharalardyń jartysy tolyq iske asyrylǵan.
— Medıtsınalyq kómektiń qarjylyq qoljetimdiligi de salystyrmaly túrde joǵary deńgeıde. Azamattardyń densaýlyq saqtaýǵa óz qaltasynan jumsaıtyn shyǵystarynyń úlesi — 27,3%. Bul Ortalyq Azııanyń basqa elderindegi kórsetkishten 1,5-2,9 ese tómen, — delingen habarlamada.
Qazaqstan ómir sapasyna qatysty halyqaralyq reıtıngterde de joǵary pozıtsııada. El — BUU-nyń Baqyt ındeksi boıynsha alǵashqy 50 eldiń qataryna kiretin TMD-daǵy jalǵyz memleket. 147 eldiń ishinde Qazaqstan 33-orynda tur.
Al turaqty damý maqsattaryna qol jetkizý reıtınginde Qazaqstan 167 eldiń arasynda 67-orynǵa kóterilgen. «Jaqsy densaýlyq jáne ál-aýqat» baǵyty boıynsha náresteler men balalar óliminiń azaıýy, týberkýlezben syrqattanýdyń tómendeýi jáne ómir súrý uzaqtyǵynyń artýy atap ótilgen.
Eske salaıyq, buǵan deıin densaýlyq saqtaý salasynda qandaı ózgerister bolǵanyn jazǵanbyz.
