Elimizde ómir súrý uzaqtyǵy alǵash ret 75,9 jasqa jetti – Toqaev

ASTANA. KAZINFORM – Bul týraly Memleket basshysy máslıhat depýtattarynyń ІІІ respýblıkalyq forýmynda aıtty.  

— Kóptegen elge qaraǵanda Qazaqstanda barlyq deńgeıde aqysyz bilim alýǵa múmkindik bar. Bul qaǵıdat jańa Konstıtýtsııa jobasynda ózgerissiz saqtaldy.

Bizdiń balalarymyz memlekettik mektepterde aqysyz, ıaǵnı aqysyz oqıdy. Qazir elimizdegi kolledjderde 150 myń stýdent memleket qarjysy esebinen bilim alýda. Іzdenip-talaptansa, kez kelgen jas azamat joǵary oqý ornyna grant arqyly túse alady. Memleket mundaı grant sanyn jyl saıyn arttyryp jatyr, — dedi Prezıdent.

Elimizde ómir súrý uzaqtyǵy alǵash ret 75,9 jasqa jetti. Bul — osy aımaq elderi arasyndaǵy eń joǵary kórsetkish.

— 2023 jyldan beri ana ólimi 35 paıyzǵa azaıdy. Al sábı ólimi 20 paıyzǵa qysqaryp, tarıhı turǵydan eń tómen deńgeıge tústi.

Sońǵy jeti jylda 1259 densaýlyq saqtaý nysany salyndy. Sonyń ishinde «Aýylda densaýlyq saqtaýdy jańǵyrtý» ulttyq jobasy aıasynda 655 nysan boı kóterdi.

Byltyr Astanada naýqastardy emdeıtin Protondyq terapııa ortalyǵy ashyldy. Bul — bizdiń aımaqtaǵy teńdessiz nysan. Sondaı-aq ótken jyly «Analar saýlyǵy» baǵdarlamasy iske qosyldy. Áıelderdiń densaýlyǵyn qorǵaýǵa arnalǵan bul baǵdarlamanyń da mán-mańyzy aıryqsha.

Meniń tapsyrmammen 2021 jyldan bastap «Ańsaǵan sábı» baǵdarlamasy júzege asyrylyp jatqanyn bilesizder. Sonyń aıasynda jyl saıynǵy bólinetin kvota sany 7 ese artty (ıaǵnı 1 myńnan 7 myńǵa deıin kóbeıdi). Búginde 11 myńnan astam sábı osy EKO tásilimen dúnıege keldi, — dedi Memleket basshysy. 

Aıta ketelik Prezıdent qatysýymen máslıhat depýtattarynyń ІІІ respýblıkalyq forýmy ótip jatyr.