Elimizde jol apaty, qaterli isik jáne júrek aýrýlarynan bolatyn ólim-jitim azaıdy
ASTANA. KAZINFORM — Qazaqstanda 2026 jyldyń birinshi jartyjyldyǵynyń qorytyndysy boıynsha halyq densaýlyǵynyń birqatar negizgi kórsetkishteri jaqsardy. Bul týraly QR Densaýlyq saqtaý mınıstrliginiń alqa otyrysynda QR Densaýlyq saqtaý birinshi vıtse-mınıstri Tımýr Sultanǵazıev málimdedi.
Vedomstvonyń málimetinshe, jalpy ólim 0,8%, qanaınalym júıesi aýrýlarynan bolatyn ólim 10,9%, onkologııalyq aýrýlardan bolatyn ólim 5%, jol-kólik oqıǵalary saldarynan bolatyn ólim 20,9% tómendedi. Jeti aıda ana ólimi 17,5% azaıdy.
Jeti aıdyń qorytyndysy boıynsha ana ólimi kórsetkishi 100 myń tiri týǵan balaǵa shaqqanda 9,7-den 8,0-ge deıin tómendedi.
— Náreste ólimi 5,93 boldy, josparly kórsetkish — 7,3. Neonataldyq ólim 3,05 boldy, jospar — 4,1. Ekinshi jartyjyldyqta negizgi nazar júktilik asqynýlarynyń aldyn alýǵa, áıelder men balalardy medıtsınalyq baqylaý sapasyna, patronajǵa jáne medıtsınalyq kómekti ýaqtyly kórsetýge aýdarylady, — delingen habarlamada.
MSAK uıymdaryna profılaktıkalyq maqsatta kelý úlesi 33,7%-ǵa, jyldyq jospar — 27%-ǵa jetti.
Onkologııalyq skrınıngtermen qamtý 37,6%-dan 42%-ǵa deıin ósti. Qaterli isikterdiń eń erte — 0–I satylarynda anyqtalý úlesi 34,3%-dy qurady, josparly kórsetkish — 33,8%.
Sonymen qatar Mınıstrlik aýrýlardy erte anyqtaý kórsetkishteri tómen bolyp otyrǵan jáne patsıentterdi medıtsınalyq uıymdardyń arasynda marshrýtızatsııalaý máseleleri bar óńirlerdegi jumysty kúsheıtýdi josparlap otyr.
Eske salaıyq, buǵan deıin týa bitken patologııadan bolatyn náreste ólimi 15%-ǵa tómendegenin habarlaǵanbyz.
