Elimizde ólim-jitim azaıyp, ómir súrý uzaqtyǵy artty — mınıstr
ASTANA. KAZINFORM — Ótken jyly Qazaqstannyń densaýlyq saqtaý júıesinde birqatar naqty ózgerister júzege asyrylyp, negizgi medıtsınalyq kórsetkishter jaqsardy. Bul týraly Densaýlyq saqtaý mınıstri Aqmaral Álnazarova málimdedi.
Mınıstrdiń aıtýynsha, qabyldanǵan júıeli sheshimderdiń nátıjesinde elde jalpy ólim-jitim deńgeıi 2,6%-ǵa, onkologııalyq aýrýlardan bolatyn ólim 6,3%-ǵa tómendegen. Al sábıler ólimi tarıhı eń tómengi deńgeıge jetip, 18,7%-ǵa qysqarǵan.
Sonymen qatar 2025 jyly Qazaqstanda ómir súrý uzaqtyǵy 75,8 jasqa deıin ósti.
- Sondaı-aq Qazaqstan BUU-nyń Adamı damý ındeksinde 7 satyǵa joǵarylap, 193 eldiń ishinde 60-orynǵa kóterildi.
2025 jyly mindetti áleýmettik medıtsınalyq saqtandyrý júıesin jetildirýge baǵyttalǵan zań qabyldandy. Sonyń nátıjesinde 1 mıllıonǵa jýyq adam qosymsha medıtsınalyq kómek alý múmkindigine ıe bolady. Onkologııalyq skrınıngter kepildendirilgen tegin medıtsınalyq kómek paketine aýystyrylyp, saqtandyrylmaǵan azamattardy qamtý aıasy keńeıtildi, - dedi Álnazarova.
Mınıstr medıtsına qyzmetkerlerin quqyqtyq qorǵaý sharalarynyń da kúsheıtilgenin atap ótti. Endi dárigerlerge qatysty zorlyq-zombylyq áreketteri úshin qylmystyq jaýapkershilik qarastyrylǵan.
Sonymen qatar elde alǵashqy medıtsınalyq kómek, ana men bala densaýlyǵyn saqtaý baǵyttary kúsheıtilip, onkologııalyq qyzmet jańǵyrtylǵan. Ortalyq Azııadaǵy alǵashqy protondyq terapııa ortalyǵy iske qosylyp, aýyldyq densaýlyq saqtaý júıesin damytý, tsıfrlyq sheshimder men jasandy ıntellektini engizý jumystary jalǵasyp jatyr.
Mınıstrdiń aıtýynsha, atalǵan sharalardyń barlyǵy halyqtyń densaýlyǵyn jaqsartýǵa jáne medıtsınalyq kómektiń qoljetimdiligi men sapasyn arttyrýǵa baǵyttalǵan.
Aıta keteıik, 2026 jylǵa 567 mlrd teńgege dárilik zattar satyp alyndy.